iPhone 8’да бармоқ изи сканери ўз жойида қолади, аммо…
Apple компаниясининг «юбилей» смартфони – iPhone 8’нинг олд панелини дисплей тўлиқ эгаллаб олиши маълум. Шу сабабли, хабарларда бармоқ изи сканери қурилманинг орқа панелига «кўчирилиши» ҳақида ҳам гап боради. Бу эса Touch ID қурилманинг олдида жойлашганига ўрганиб қолган фойдаланувчиларнинг норозилигига ҳам сабаб бўлмоқда. Digitimes порталининг ёзишича, бу датчик ўз ўрнида қолади, аммо у энди аввалгиларидек бўлмайди.
Хуллас, Apple бармоқ изи сканерини тўғридан-тўғри OLED-дисплейнинг… орқасига жойлаштиради! Бу энди Android-смартфонлардаги сингари шунчаки серсорли тугмача бўлмайди. У экраннинг тагида жойлашади, керак бўлса, бармоқ изи сканери экрандаги тасвирга халақит бермаслик учун яширина олади.
Фақат битта масалани Apple қандай ҳал этиши ҳозирча номаълум: экран ойнадан бўлгач, у бармоқ изларини сақлаб қолиши аниқ. Шундай экан, эгасини бу издан таниб олиш функцияси қанчалик тўғри ишлар экан? Ҳозирча маълум бўлгани шуки, сканернинг жойлашуви сабабли, дисплей томонларининг ўзаро уйғунлиги iPhone 7 моделидаги каби 16:9 эмас, балки 18,5:9 нисбатда бўлади.
Эслатиб ўтамиз, аввалроқ блогер Бенжамин Гескин iPhone 8 флагманининг рендерларини эълон қилган, кейинроқ қурилманинг тахминий нархи ҳам айтилган эди. Унда биз бўлажак юбилей флагманининг «жонли» макетини кўришимиз мумкин. Бу макет аввал эълон қилинган чизмалар, рендерлар, видеолавҳалар ва фотосуратлардаги кўринишга мувофиқ тайёрланган.
