Xiaomi Mi Metal Pen: шарикли ручкани ҳам бегонадан олманг!
Тиниб-тинчимас Xiaomi компанияси 2016 йилда ўзининг илк шарикли Mi Pen ручкасини ишлаб чиқаришни йўлга қўйган эди. Ана энди MiJia ручкалар туркумида яна бир янги модел тақдим этилди. Дизайн аввалги ручкадан фарқ қилмайди, фақат бу галгиси металл корпусли. Xiaomi Mi Metal Pen ручкаси Хитойда 24.9 юан, яъни $3.6 доллардан сотувга чиқарилди.
Ручка кумуш ва тилла рангдаги корпусларда ишлаб чиқарилмоқда. Корпус учун фойдаланилаётган асосий хомашё — металл сирти электролиз усулида оксид пардаси билан қопланган алюминий, ручка қисқичи бўлса рух қотишмасидан тайёрланган. Ҳар иккала металл қисмлар ейилмас ва занглашдан ҳимояланган.
Xiaomi ручкада айланма механизмни жорий қилган — юқори қисм 180 градусга кўтарилгандагина ручканинг учи равон ҳаракатланиб, ёза бошлайди. Ручка стержени таниқли швейцариялик компания — PREMEC томонидан ишлаб чиқарилмоқда. Xiaomi Mi Metal Pen корпуси диаметри 9.5 мм.
Бугунги кунда Xiaomi Mi Pen’нинг оригинал, яъни пластик корпусли модели $1.9 доллардан сотилмоқда.
