Samsung’нинг қўшалоқ камерали илк смартфони видеода акс этди

Ҳали тақдим этилмаган моделларнинг қисқа тавсифлари, сурат ва видеоларини эълон қилиши билан танилган инсайдер @OnLeaks энди Samsung’нинг иккита камерага эга биринчи смартфони – Galaxy C10 рендерини тарқатди.

Samsung учун биринчиси

Galaxy C тизимидаги смартфонлар ўрта нарх сегментига мансуб. Қизиғи шундаки, негадир Samsung ўзининг флагманларида қўшалоқ камера қўлламайди.

Ҳозиргача қўш камерали қуйидаги флагманлар маълум:

1. iPhone 7 Plus – оддий кўриш бурчагига эга модуль + икки каррали зум ҳамда портретлар учун телеобъектив;
2. Huawei P10 – рангли модуль + динамик диапазонни кенгайтириш учун оқ-қора модуль;
3. LG G6 – оддий кўриш бурчагига эга модуль + кенг бурчакли объектив.

Samsung ўзининг Galaxy C10 моделида мана шу учта йўлдан бирортасини танлайдими ёки умуман ўзгача йўл тутадими – буниси ҳали номаълум.

Лекин шуниси ҳам борки, Samsung’нинг флагман смартфони Galaxy S8 бош камераси «қўш кўзли» LG G6 ва iPhone 7 Plus’га қарши «жанг»да фақатгина портрет суратга олишда, ташқарида олинган суратларнинг сифати бўйича яхши натижа кўрсата олган, холос. Эҳтимол, Galaxy C10 унинг учун «реванш»да ғолиб келар – буни ҳали кўрамиз.

Ҳар томонлама кўринг

Мана, қуйидаги видеолавҳада Galaxy C10 смартфонини ҳар томонидан томоша қилиш мумкин:

Видеороликда дисплей остида бармоқ изи сканери, қўш камера модули, USB Type-C ва қулоқчин учун 3,5 мм.лик тирқиш кўринади. Чап ёнида, худди Galaxy S8 моделидаги каби, Bixby ёрдамчисини чақирувчи тугмача жойлашган. Galaxy C10 металл корпусга ва диагонали 5,5 дюймли дисплейга эга бўлиб, ўлчамлари 152,5х74,8х7,68 мм.

Мазкур девайснинг хусусиятлари билан мана бу мақоламизда батафсил танишиб чиқишингиз мумкин. Унинг тақдимоти жорий йилнинг учинчи чорагида бўлиши кутилмоқда.