Янгиланган Nokia 3310 ҳақида билишингиз керак бўлган 8 маълумот
Жорий йилда қайтадан ишлаб чиқарилган ҳамда MWC 2017 кўргазмасида тақдим этилган янгича Nokia 3310 (2017) модели ҳам аллақачон савдога қўйилганидан хабарингиз бор. Россияда уларнинг илк партияси бир кундаёқ сотиб тугатилгани, бунгача Хитойда сохта Nokia 3310 сотувга чиққанини ҳам маълум қилганмиз. Шунингдек, пойтахтимиздаги «Малика» савдо марказида ҳам бу телефон сотилмоқда, аммо нархи…
Хуллас, оригинал Nokia 3310 (2017) телефонига қизиқаётганлар учун ушбу модель хусусидаги айрим фактларни эълон қилмоқдамиз. Ахир, харид қилишдан аввал унинг хусусиятларини билиб қўйганингиз яхши-да!
Қани, кетдик!
- Сизнинг SIM-картангиз унга тушмаслиги мумкин.
Замонавий смартфонларнинг слотлари, одатда, nano-SIM форматига мўлжалланган. «Қайта туғилган» Nokia 3310 эса micro-SIM форматига мослаб чиқарилган, шунинг учун бу масалада сал мураккабликлар юзага келиши мумкин.
Тўғри, кейинги пайтларда уяли алоқа операторлари мультиформатли SIM-карталар тақдим этишяпти: mini-SIM ўлчамидаги картачадан ўзингизга керакли – телефонингизга мос micro-SIM ёки nano-SIM форматидаги картачани чиқариб олиш мумкин. Агар сиз ўша ташқи ўлчамларни ҳам сақлаб қўйган бўлсангиз, унга nano-SIM’ни жойлаб, micro-SIM форматига айлантириб, янги Nokia 3310 телефонига қўйсангиз бўлади. Агар сақланиб қолмаган бўлса, SIM-карта адаптери сотиб олиш ёки сизга хизмат кўрсатаётган уяли алоқа операторига мурожаат этиб, мультиформатли SIM-картага алмаштириб олишингиз мумкин.
- Орқа панель қопқоғини очиш ўта қийин – тирноғингиз синиб қолмасин!
Nokia 3310 (2017) моделидан фойдалана бошлаш учун, бир замонлардагидек, унинг орқа қопқоғини очиб, батареясини ва SIM-картани қўйиш лозим. Мана шу жойида эҳтиёткорлик қилишингиз керак бўлади. Чунки унинг қопқоғи шу қадар қаттиқ ёпиладики, очаман деб тирноғингизни синдириб олишингиз ҳеч гапмас.
- Унда WhatsApp ва Viber йўқ…
Қурилма S30+ мобил операцион тизимида ишлайди, бу тизим эса, интернетга кириш имконини тақдим этса-да, мессенжерларни қўллаб-қувватламайди. Шу боис, агарда бундан буёғига фақат янги Nokia 3310 тутадиган бўлсангиз, чатларда ёзишиб ўтиришларни эсдан чиқарасиз. Балки бир томондан бу яхшидир ҳам – аввал мессенжерлардаги бекорчи гапларга сарфлаб юрган вақтингизни энди фойдали ишларга сарфлайсиз.
- …аммо Facebook’ка кира оласиз!
Телефонга ишлаб чиқарувчи томонидан ўрнатилган Opera браузери орқали сайтларнинг мобил версияларига кириш имкони мавжуд. Facebook ёки «ВКонтакте» бўладими, бошқа сайтларми – аксариятининг телефонларга мослаштирилган талқини мавжуд. Тўғри, сайтларни кичкина экранда кўриш ноқулай бўлади, яна секин ишловчи 2G-интернет шароитида… Лекин нима ҳам дердик, йўқдан кўра яхшироқ-да.
- Тугмачалардан фойдаланиш дастлаб ноқулай бўлади.
Агарда бир неча йилдан бери смартфондан фойдаланиб, у билан сенсор экран орқали «тиллашиб» келаётган бўлсангиз, дастлабки пайтларда Nokia 3310 (2017) билан «тил топишиш»ингиз қийин кечади. Ҳали бирор иловани очиш мақсадида экранда унинг белгичасини ёки сайтга ўтиш учун ҳаволани бармоқ билан босиб кўришлар бўлади. Аммо бир неча кундан сўнг тугмачалар орқали ишлашга кўникиб кетасиз.
- «Илонча» ўйини энди аввалгидек эмас.
Агарда сиз айнан ўша қадрдон бўлиб қолган «Илонча» – «Змейка» ўйини учун Nokia 3310 телефонини харид қилишни кўзлаётган бўлсангиз, ҳафсалангизни пир қилишга мажбурмиз. Бу ўйин энди аввалгидек кўринишда эмас, уни қайта ишлашган. Ўйиннинг ташқи кўриниши ўзгартирилган, бонуслар қўшилган, илончанинг йўлларига мини-қопқончалар қўйилган, «ҳурмат тахтаси» жорий этилган… Хуллас, бу энди ўша сиз билган ва севган «Илонча» эмас, ҳатто ундан ёмонроқ янги талқин, десак ҳам хато бўлмайди.
- Янгиланган Nokia 3310 қуввати жуда узоқ вақтга етади.
4G, Wi-Fi, сенсор экран сингари қувватни «очофатларча ейдиган» жиҳатлар янги Nokia 3310’да йўқлиги маълум. Шу боис ҳам 1200 мА/соат сиғимли аккумуляторнинг қуввати, агар телефонни ўртача ишлатсангиз, бир ҳафтага етади. Бу борада расмий кўрсаткичлар бунақа: тўлдирилган батареянинг қуввати кутиш режимида 607 соат, фаол фойдаланишда эса 22 соатга етади.
- Қўшимча хотира картаси сотиб олишингизга тўғри келади.
Дастлабки Nokia 3310 телефонидан фарқли равишда, унинг янгиланган талқинида айрим қўшимча функциялар бор. Жумладан, қурилма хотирасидаги аудиофайллардан мусиқа тинглаш ҳамда 2 мегапикселли камераси орқали суратга олиш мумкин. Аммо телефоннинг атиги 16 мегабайтлик ички хотирасига 12 тача расм сиғиши мумкин, холос (шундаям уни мусиқа билан тўлдирмаган бўлсангиз)! Шундай экан, агарда телефонда мусиқа тинглаш ниятингиз ҳам бўлса, у ҳолда microSD хотира картасини сотиб олишингиз керак бўлади.
Хуллас, шунақа гаплар…
Шунингдек, мазкур телефоннинг оригинал ва қайта чиқарилган версияларни таққосланган, янги талқин ҳақидаги бошқа маълумотлар берилган мақолаларимизга ҳам назар солишни тавсия этамиз.
