Хитойда маҳаллий “iPhone 8” сотувга чиқди

Хитойда маҳаллий “iPhone 8” сотувга чиқди

“Смартфон фабрикаси” дея аталувчи Хитой хоҳлаган моделдаги смартфонларнинг сохта талқинини ярата олиши билан машҳур. Пулнинг кетидан қувган ишлаб чиқарувчиларнинг таниқли брендлардан илҳомланиб яратган ўхшатма смартфонлари аслидан бир неча баробар арзон. Ўтган ҳафтада Хитойда Apple ҳали тақдим қилмаган iPhone 8 смартфонининг клоуни 300 АҚШ долларидан сотувга чиққан. Бу смартфон Android операцион тизими бошқарувида фаолият кўрсатади.

Маълум бўлишича, Apple’нинг кейинги айфонига оид рендер ва гап-сўзлар асосида ўзлаштирилган сохта iPhone 8’нинг олд панели тўлиқ экрандан иборат. Экран атрофи жуда юпқа ром билан ўралган. Шунингдек, унинг орқа панелидаги қўш камералари ҳам вертикал ҳолатда жойлашган. Бош камерадан қуйироқда эса бармоқ излари сканери мавжуд. Смартфон корпуси металлдан тайёрланган ва ҳаттоки унга Apple логотипи туширилган.

Хитойлик бу ҳаваскор гаджет 200 АҚШ долларидан пулланмоқда. У техник жиҳатдан камчиликларга бой ва iPhone 8 бўла олмайди. Шунга қарамасдан, Хитойда бундай смартфонларга эҳтиёж юқори.

Apple корпорацияси айфоннинг 8-авлодини тақдим қилмагани учун ҳозирча «iPhone 8» ишлаб чиқарувчиларини судга бера олмаслиги мумкин. Маҳаллий ишлаб чиқарувчиларининг эса маҳсулотларини сотишлари учун кузгача вақтлари бор. Кузда тақдим қилиниши кутилаётган оригинал iPhone 8’нинг $1000 доллардан сотилиши айтилмоқда.

Сайт янгиликларидан доимий хабардор бўлиш учун Телеграм каналимизга қўшилинг!