Samsung’нинг таниқли «раскладушка»си қайта тақдим қилинди
Бугун Samsung компанияси расман буклама клавиатурага эга Samsung Galaxy Folder 2 смартфонини тақдим қилди.
Samsung Galaxy Folder 2 — бу «раскладушка» шаклидаги смартфон бундан 10 йиллар аввал смартфон бозорида оммабоп бўлган телефон аппаратларини эслатади. Шундай бўлса ҳам, аппарат замонавий жиҳатларга эга. Жумладан, гаджет Android 6.0 операцион тизимида фаолият кўрсатади.
Жиҳатлари
Galaxy Folder 2 экранининг диагонали 3.8 дюйм, сенсор клавиатураси етарлича катта ва корпус металлдан тайёрланган. Шу билан бирга, смартфонда алоқалар, хат-хабар, камера ва қўнғироқларни тезкор амалга оширишга ёрдам берадиган, ижтимоий тармоқ ва мессенжерларни тезкор очадиган анъанавий тўртбурчак шаклдаги бош тугма мавжуд.
Смартфонда 1,4 гигагерц частота тезлигида ишлайдиган 8 ядроли процессор, 2 гигабайтли тезкор ва 16 ГБ доимий хотира ўрнатилган. Шунингдек, телефонда Micro SD хотира картаси учун бўлмача ҳам мавжуд. Смартфон корпусининг олинадиган аккумулятори 1950 мА соат электр токи сиғимига эга. Гаджет 8 мегапикселли бош ва 5 мегапикселли олд камералари билан мақтана олади.
Аудитория ва баҳоси
Аҳамиятли жиҳати, Samsung бу телефондаги ўртача овоз даражасини 11 дан 13 га кўтарган. Афтидан, гаджет ўрта ёшли одамларга мўлжалланган. Galaxy Folder 2 девайси 23 июндан $260 доллар баҳосида сотувга чиқарилади.
