Илк Xiaomi ноутбуки ишлаб чиқарилиши бир неча ойга кечиктирилди
Хитойнинг Xiaomi компанияси ўзининг илк ноутбукини ишлаб чиқаришга киришишни ортга суришга қарор қилди. DigiTimes нашри маълумотларига кўра, янги маҳсулотни туркум ишлаб чиқариш май ойига қадар кечиктирилган.
Аввалроқ ушбу таснифда бир қанча қурилма ишлаб чиқарилиши маълум қилинган бўлса, эндиликда экран диагонали 12,5 дюйм бўлган биргина модел устида гап кетмоқда.
Шундай қилиб, Xiaomi ноутбуки шу йилнинг июнидан эрта савдога чиқарилмайди. Унгача бўлган вақт ичида эса компания савдо ва хизмат кўрсатиш тармоқларини кенгайтириш устида иш олиб боради.
Ноутбукнинг металл қобиқ (корпус)да чиқарилиши, операцион система сифатида эса Windows 10дан фойдаланилиши кутилмоқда. Техник хусусиятлар тўғрисида ҳозирча маълумотлар йўқ. Ахборот манбаларининг баҳосига кўра, илк партиядан 400 мингдан бир миллион донагача қурилма жой олади.
Эслатиб ўтамиз, Xiaomi компаниясининг энг яқин тақдимоти 29 март куни ўтказилади. Катта эҳтимол билан мазкур презентацияда модификацияланган, бармоқ изи сканери ўрнатилган Redmi 3 арзон смартфони тақдим этилади.
