Смартфон ёруғлигида ишлайдиган дунёдаги энг кичик 3D-принтер ишлаб чиқилди

Смартфон базасида ишлайдиган илк 3D-принтер Американинг OLO стартапи томонидан ишлаб чиқилди. Смартфон қуввати ва унинг ёруғлиги асосида ишлайдиган қурилмани Kickstarter орқали 99 доллар лойиҳага сармоя киритган ҳолда сотиб олиш мумкин.

OLO – мавҳум лойиҳа эмас, тўлақонли иш берадиган ускуна. Уни биринчи марта 2015 йилнинг октябрида Нью-Йоркда, гаджет World Maker Faire Editor’s Choice Award мукофотини қўлга киритган вақтда тақдим этишган эди.

Вазни 780 грамм бўлган қурилманинг ўлчамлари 172х115х148 мм бўлиб, анъанавий 3D-принтерда қўлланиладиган қимматбаҳо эҳтиёт қисмлари йўқлиги сабабли жуда арзон баҳоланмоқда. Ўзининг процессори ва унга ҳамроҳ қисмлар ишини смартфон бажаради, тўртта оддий батареялар эса аккумулятор вазифасини адо этади.

OLO қарийб барча смартфонларга “тушади” ва Android, iOS ва Windows мобил операцион системаларини қўллаб-қувватлайди. Унинг камчилиги иккита: чоп этиш мумкин бўлган моделнинг чекланган ҳажми ва фақатгина ўзини ишлаб чиқарган фирма хом ашёларидан ишлайди.

OLO уч қисмдан таркиб топган – смартфон ўрнатиладиган асос, ичида чоп этиш жараёни амалга ошадиган кенг ромлар ва двигатель. Двигателга ҳаракатланувчи пластина бириктирилган бўлиб, у чоп этиладиган объектни шакллантиради. Смартфон ёруғлиги эса чоп этиш хом ашёси ҳисобланган суюқ полимерни қотириш учун керак бўлади.

Принтер қуйидагича ишлайди:

Ишлаб чиқарувчиларнинг қайд этишларича, Autodesk 123D Catch дастуридан фойдаланган ҳолда ҳар қандай уч ўлчамли объектни чоп этиш, унинг моделини ишлаб чиқиш ва 10 дақиқа ичида уни 3D-принтерда чоп этиш мумкин. Биринчи сармоядорлар OLO`ни 2016 йилнинг сентябридан синаб кўришлари мумкин.