NexDock – смартфон ёрдамида ишлайдиган ноутбук (видео)
Февраль ойида Indiegogo краудфандинг майдончасида оддий ноутбукка ўхшайдиган, бироқ ишлаши учун смартфон, планшет, флешка-компьютер ёки бир платали Raspberry Pi мини компьютерига уланиш талаб қилинадиган NexDock қурилмаси лойиҳаси старт олган эди. Кампания якунланишига бир неча кун қолган вақтларда док-станция яратувчилари кўзлаган мақсадлари – 300 минг доллардан зиёдроқ маблағни тўплаб улгуришди. Стартап жамоаси сўзларига кўра, янги маҳсулотга Microsoft муҳандислари ҳам қизиқиш билдиришган.
NexDock 14,1 дюймли (1366×768 пиксел) дисплей, иккита USB порт, mini-HDMI интерфейс, microSD хотира картаси учун слот, қулоқчин ва карнайлар учун 3,5 мм ўлчамли чиқиш бўлинмаси (аудиоразъём) билан таъминланган. Автоном ишлаши учун эса 10 минг мАсоатлик қувват тоши (аккумулятор) ўрнатилган.
Continuum технологияси Windows 10 Mobile операцион тизими асосида ишлайдиган мобил қурилмани ишчи ноутбукига айлантириб беради. Intel Compute Stick сингари микрокомпьютерлар билан эса фойдаланувчи тўлақонли операцион тизимга эга бўлади. Лойиҳа асосчиларидан бирининг қайд этишича, буюртмалар орасида Raspberry Pi 3 етакчилик қилмоқда. NexDock, шунингдек, одатий компьютер ёки Android асосида ишлайдиган гаджетлар учун иккинчи экран вазифасини бажаради. Бунинг учун MHL-уланиш модели ёки махсус симсиз адаптер талаб қилинади. Қурилма ўлчамлари 351x233x20 мм, вазни эса 1490 г.
Айни пайтда NexDock 331 минг доллар йиғиб улгурди. Кампания бошланган вақтда унга 80 доллар тўлаб буюртма бериш мумкин бўлса, ҳозирда ушбу талқин сотиб бўлинган ва қурилма нархи 119 доллардан бошланмоқда. Савдолар бошланганидан кейин эса унинг баҳоси 150 долларга етади. Илк маҳсулотлар 2016 йил июнидан харидорлар қўлига етиб боради.
