Vivo Xplay 5 Elite – Galaxy S7 Edge’нинг хитойлик “кушандаси”
Lenovo ҳамда Huawei компанияларидан сўнг жаҳон бозорига шиддат билан кириб келаётган Xiaomi, Meizu брендлари қаторидан Vivo компанияси ҳам жой олишга улгурди.
Vivo компанияси 2016 йилнинг март ойида намойиш қилган Vivo Xplay 5 Elite (Ultimate 5s) флагмани Samsung’нинг сўнгги инновацион гаджетларига қарши майдонга чиқмоқчи.
Дизайн
Xplay 5 Elite корпуси металл ва шишадан тайёрланган. Олд шиша панел икки ёнга қайрилган ва Galaxy S7 Edge’ни эслатади.
Орқа панелнинг кўриниши iPhone’ни эслатади: фоточақноқли камера бурчакда, ўткир бўлмаган қирралар.
Vivo Xplay 5 Elite бўйига 15,3, энига 7,6 см бўлиб, қалинлиги 7,6 мм. Олд панелнинг 70 фоиз қисми экрандан иборат. Яна бир муҳим жиҳати – унинг 167 граммли вазни.
Смартфон дисплейининг диагонали 5,43 дюйм. Samsung томонидан SuperAMOLED технологиясида ишлаб чиқарилган экраннинг пиксель сиғими 2560х1440, яъни ҳар дюйм квадратда 541 белги. Тасвир сифати Samsung’нинг смартфонлариникидан қолишмайди.
Процессор
Телефон аппарати замонамизнинг энг тезкор процессори – 4 ядроли, 2,15 ГГц частота тезлигигигача ишлай оладиган Qualcomm Snapdragon 820 билан таъминланган. Шунингдек, смартфонда Adreno 530 график-тасвир процессори ҳам мавжуд. Vivo Xplay 5 Elite AnTuTu имтиҳонида 135 балл олиб, 2016 йилнинг 1-чорагида ишлаб чиқарилган энг тезкор гаджетлардан бирига айланди.
Xplay 5 Elite смартфонининг энг муҳим жиҳати – унинг 6 Гб сиғимли тезкор хотираси. Гаджетнинг кейинги 3 йилда ишлаб чиқариладиган ҳар қандай дастурий таъминот ва иловаларни қўллаб-қувватлашга имкони етади. Смартфоннинг доимий ички хотираси 128 Гб.
Операцион тизим
AnTuTu’да Xplay 5 Elite’нинг Андроид 5.1 ўрнатилгани кўрсатилган бўлса ҳам, компаниянинг айтишича, смартфон Android 6’нинг молаштирилган FunTouch OS 2.6 талқинида ишлайди.
Камера
Виво смартфонлари камерасига нисбатан жамоатчиликда ижобий фикр шаклланган. Xplay 5 Elite’нинг 16 МП бош, 8 МП олд камералари Sony томонидан ишлаб чиқарилган. Уларнинг диафрагмаси – f/2.8. Камерада фазвий автофокус, HDR функцияси ва қўш-диодли фоточақноқ мавжуд.
Суратлар сифат бўйича S7’дан озгина орқада. Камеранинг фокус тизими бир оз секин ишлайди. iPhone 6s билан солиштирганда камеранинг ишлаш сифат юқори. Vivo Xplay 5 Elite камерасининг дастури профессионал Arcsoft компанияси томонидан ишлаб чиқарилган.
Бош камера 4K UHD (3840х2160) сиғимли видео суртага олади. Олд камерада FHD 1920х1080 сиғимли тасивр ёзиш мумкин.
Аккумулятор
Xplay 5 Elite’нинг қувват тоши ҳам ҳавас қиларли даражада, яъни 3600 мА соат. Уни тўла қувватлаб ўртача алоқада 2-3 кун фойдаланиш, 13 соат ўртача экран ёруғлигида видео кўриш, 5 соат ўйин ўйнаш мумкин. QuickCharge 3 тезкор қувват олиш тизимида 3-4 соат ичида аккумулятор тўла қувватланади.
Коммуникация
Телефон алоқанинг GSM, 3G ва LTE технологиясини қўллаб-қувватлайди. Wi-Fi алоқа технологияси 2.4 ва 5 ГГц частоталарида ишлайди. Шунингдек, смартфонда Bluetooth 4,2 сўнгги технологияси, GPS ва ГЛОНАСС навигация тизимлари жорий қилинган.
Смартфонда NFC яқин масофадан туриб контактсиз тўловни амалга ошириш технологияси татбиқ қилинган.
Нарх-наво
Смартфоннинг Хитойдаги баҳоси 650 АҚШ доллар бўлиши тахмин қилинмоқда. Халқаро бозордаги нархи эса 800 долларгача кўтарилади. Amazon интернет дўконида эса Samsung Galaxy S7 Edge узоғи билан 730 АҚШ долларидан сотилмоқда.
Vivo Xplay 5 Elite’да олинган суратлар:
