Samsung июнда Galaxy S7 edge’нинг “Бэтмен” талқинини савдога чиқаради

Samsung компанияси чекланган тиражда ишлаб чиқарилиши режалаштирилаётган Galaxy S7 edge Injustice Edition смартфонини тақдим қилди.

“Ақлли телефон”нинг мазкур талқини Warner Bros. Interactive Entertainment ҳамда DC Entertainment компаниялари билан ҳамкорликда файтинг жанридаги машҳур “Injustice: Gods Among Us” видеоўйини тақдим этилганининг 3 йиллиги муносабати билан ишлаб чиқарилмоқда.

Samsung Galaxy S7 edge Injustice Edition талқини июнь ойида  Хитой, Россия, Сингапур, Корея, Лотин Америкасида сотувга чиқарилади.

Galaxy S7 edge Injustice Edition тим қора корпусга эга бўлиб, унда махсус декоратив элементлардан фойдаланилган. Хусусан, корпуснинг орқа панелида қаҳрамон Бэтменни эслатувчи тилларанг логотип мавжуд.

Унинг картон упаковкаси ҳам файтинг ўйинлари услубида безатилган. Мобиль алоқа воситаси билан биргаликда харидорлар махсус чехол, виртуал воқелик кўзойнаги, “Injustice: Gods Among Us” видео ўйинини виртуал воқелик контентида ўйнаш учун ваучерга эга бўлишади.

Galaxy S7 edge’нинг Injustice талқини неча пулдан сотилиши тўғрисида ҳозирча аниқ маълумот йўқ. Айни пайтда жаҳоннинг энг инновацион смартфони сифатида эътироф этилаётган Galaxy S7 edge мобиль алоқа воситаси Amazon интернет дўконида 740 АҚШ долларигача сотилмоқда.