HP Elite x3’нинг сотилиш муддати ва нархи маълум бўлди
Жорий йил бошида ўтган Жаҳон Мобиль Конгрессида HP компанияси томонидан намойиш қилинган янги Elite x3 фаблетининг хусусиятлари кўпчиликда ижобий таассурот уйғотган эди. HP томонидан ишбилармон доира вакилларига мўлжаллаб ишлаб чиқарилган мазкур Windows флагмани Windows Continuum тизимига эга бўлиб, уни монитор ва клавиатурага улаш мумкин.
Аммо кўпчилик экспертлар ушбу қурилманинг оммалашишига шубҳа билан қараган, унинг намойиши қоғозда қолиб кетишини тахмин қилишган эди. Аммо, жорий ҳафтада Elite x3 яна жамоатчилик диққатини ўзига қаратмоқда. Компаниянинг маълум қилишича, мазкур мобиль алоқа воситаси августдан бошлаб дунёнинг 46 давлатида сотила бошлайди.
195 грамм тош босувчи “ақлли” қурилма бўйига 161.8, энига 83.5 мм, корпус қалинлиги 7.8 мм.
HP Elite x3 гаджети Qualcomm’нинг Snapdragon 820 процессорида, Microsoft’нинг Windows 10 мобиль операцион тизимида фаолият кўрсатади. Қурилма 5.96” дюймли, сиғими 2560×1440 бўлган AMOLED платформали дисплей, 4 ГБ тезкор хотира, 64 ГБ доимий ички хотира, 2 ТБгача бўлган хотира картасини қўллаб-қувватлайдиган microSD бўлмачаси билан таъминланган.
Унинг бош камераси 16 МП, олд камераси 8 МП си-имли суратлар олади.
Смартфон 4G/LTE, 802.11ac Wi-Fi, Bluetooth 4.0 алоқа тармоқларида ишлашга мўлжалланган. Унда USB Type-C универсал коннектори мавжуд. Elite x3 сиғими 4150 мА соат аккумуляторга эга.
Бизнес соҳаси вакилларига мўлжалланган HP Elite x3 ахборот хавфсизлиги сертифактига эга. У кўзнинг рангдор пардаси ва бармоқ излари сканерлари билан «қуроллантирилган». Шунингдек, телефон аппарати маълумотларни шифрлаш орқали хавфсизлигини таъминлаш тизимига ҳам эга.
HP Elite x3’га улашга мўлжалланган, мустақил процессор ва хотирага эга бўлмаган Mobile Extender ноутбукини ҳам сотишни режа қилган. Mobile Extender ноутбукида 1920×1080 пиксель сиғимли, 12.5” дюймли дисплейга, USB-C портига, аудио карнай, намга чидамли клавиатура мавжуд бўлади.
HP вакили берган маълумотга кўра Engadget нашрининг маълум қилишича, фаблет АҚШда $699 доллардан, қўшимча аксессуарлар билан бирга $799 доллардан сотувга чиқарилади. Қўшимча ноутбукнинг нархи ҳозирча маълум эмас.
