Apple: “Биз миллиард дона iPhone сотдик”.

Apple: “Биз миллиард дона iPhone сотдик”.

Мазкур ҳафта бошида Apple компанияси июль охирига қадар Ер юзида миллиард дона iPhone сотилган бўлишини маълум қилди. 27 июль куни компания бош директори ходимлар билан ўтган учрашувда Apple бу шарафли мақсадни уддалаганини маълум қилган.
Тим Кук iPhone смартфони инсоният тарихида муваффақиятли ва янгилик олиб кирган энг муҳим воситалардан бири бўлганини қайд этган. Компания етакчисининг сўзларига кўра, iPhone кўпчиликнинг ҳаётини қулайлаштирган, муҳим бўлаги бўла олган яқин кўмакчидир.
Time журнали томонидан жорий ҳафтада эълон қилинган “Барча даврларнинг 50 та муҳим воситалари рўйхати”да ҳам Apple iPhone 1-ўринга муносиб кўрилган. Журналнинг айтишича, айфон инсоннинг ахборотга бўлган муносабатини тубдан ўзгаришига хизмат қилган. Шунингдек, Apple’нинг Macintosh ҳамда iPod, iPad ва iBook қурилмалари ҳам мазкур рўйхатдан ўрин эгаллаган.

“Биз доимо бирор янгиликка эга бўлган муносиб маҳсулот тайёрлашга ҳаракат қилдик. Шунинг эвазига миллиард дона iPhone сотишга муваффақ бўлдик. Apple’га дунёни ҳар куни ўзгартиришга ёрдам берган барчага миннатдорчилик билдираман”, дейди техно-гигант раҳбари.

Эслатиб ўтамиз, илк айфон қурилмаси 2007 йилнинг 9 январида компания асосчиси Стив Жобс томонидан эълон қилинган эди. Миллиард дона мазкур гаджетдан сотиш учун компанияга 9 йил керак бўлди. Шу билан бирга, айтиш керакки, 2016 йилнинг сўнгги 2 чорагида компания кетмони учмай қолди ва савдо 15 фоизга пасайган. Аммо, компания сентябрда тақдим этиши кутилаётган янги айфон унинг смартфон бозоридаги нуфузини тиклашини катта ишонч билан маълум қилган.

Terabayt.uz сайтининг видеолари: Youtube'даги каналимизда!