Samsung J7 2016: илҳом ва илғорлик уйғун ҳамёнбоп гаджет

Қисқача техник тавсиф

Операцион тизим: Android 6.0.1.

Дисплей: SuperAMOLED, 5.5 дюйм, 1280х720 пиксель сиғимли (267 ppi), “кўчада” режими мавжуд, ёруғликни автоматик созлаш тизими татбиқ этилмаган.

Хотира: талқинидан келиб чиқиб, 2/3 ГБ тезкор хотира, 16 ГБ (10.8 ГБ фойдаланувчи учун) доимий ички хотира, 128 ГБ.гача қўшимча хотира картасини ўқийдиган бўлмача.

Процессор: Exynos 7870, частота тезлиги 1.6 ГГц бўлган 8 ядроли, Mali-T830 график процессори.

Бош камера: 13 мегапикселли, ёруғлик қамрови – f/1.9, светодиодли фоточақноқ.

Олд камера: 5 мегапикселли, светодиодли фоточақноқ.

Аккумулятор: Li-Ion 3300 мА соат, тўлиқ қувват билан 22 соат видео томоша қилиш, 11/14/15  соат алоқа тармоқларида (3G/4G/Wi-Fi) ишлаш мумкин. Фавқулодда қувват тежаш режими мавжуд.

Сим карта: 2 та microSIM-карталар.

Алоқа тармоқлари: 2G, 3G, 4G, GPRS, HSPA, EDGE, LTE, Wi-Fi 802.11 b,g,n, Bluetooth 4.1, NFC, FM-радио.

Ўлчамлари: 151.7х76х7.8 мм, оғирлиги – 169 грамм.

Комплектда смартфон аппарати, аккумулятор, қувватлаш қурилмаси, USB кабели, симли стереогарнитура, қўлланма мавжуд бўлади.

Samsung J7 2016: Халқаро бозордаги ўрни

Гелекси смартфонлари оиласининг “J” туркуми 2015 йилдан бошлаб ишлаб чиқарила бошланган. “J” модели ҳам “А” туркуми сингари ҳамёнбоп, бироқ мазкур туркумга кирувчи смартфонлардан нисбатан кучсизроқ жиҳатларга эга. Унинг ўлчамлари, экран диагонали “А” туркумни эслатади. Баъзи бир кичкина жиҳатларнинг жорий қилинмагани ким учундир аҳамиятли, ким учундир у қадар муҳим эмас.

Хитойнинг баъзи смартфонлари билан солиштирганда, 5.5 дюймли “J” туркуми рақобатда устун келиши тайин. Нарх-навоси ҳам хитойлик “шоввоз” смартфонлар билан деярли бир хил. Samsung Galaxy J7 2016 халқаро смартфон бозорида энг кўп сотилаётган ҳамёнбоп мобиль телефонлар қаторидан ўрин эгаллаган.

Нега? Гап шундаки, хитойлик ёки бошқа компаниялар 5.5 дюймли кўплаб турдаги фаблетларни бозорга чиқаришса-да, уларнинг оммавий сотилишида бир тўсиқ бор – харидор уларни Самсунгни билганчалик яхши билмайди. Яъни, энди чиқиб келаётган брендлар ҳали ишончни оқламаган. Уларнинг арзон гаджетларида у ёки бу турдаги камчилик албатта кузатилади. Қолаверса,  J7 SuperAMOLED экран ушбу мобиль алоқа воситасининг рақибларидан устунлигини таъминлайди.

2016 йилда Samsung J7’га бўлган қизиқишни инобатга олиб, уни бир қатор янги жиҳатлар билан, жумладан пардоз дизайнини, 2 баробар узоғроқ ишлайдиган қувват технологиясини янгилади. Шунингдек, оператив хотира сиғими ҳам кенгайди. Аммо кучли ва узоққа етадиган аккумулятор унинг бозордаги ўрнини мустаҳкамлади.

Бу Samsung’нинг мустаҳкам қувват тизими ва Exynos процессорлари татбиқ этилган икл ҳамёнбоп смартфони. Яъни, баъзи жиҳатлари билан у флагман даражасидаги “ақлли телефон”лар билан куч синаша олади.

Samsung Galaxy J7 2016 йирик ва сифатли экранга эга бўлган, ўйин ўйнашни ёки видео тасвир томоша қилишни истаган, 1-2 кун смартфонни қувватлаш ташвишидан халос бўлиш орзусида юрган смартфон ишқибозлари учун ишлаб чиқарилади.

Гапни қисқа қилиб, батафсил тавсифга ўтамиз.

Samsung J7 2016: Дизайн, ўлчамлари ҳамда бошқарув элементлари

Бу илк шахсий тавсифим бўлгани учун Galaxy J7 2016’ни ўзгача ҳаяжон ва эътибор билан қўлга олдим. Кафтга “қўниши” билан корпус атрофини ўраб олган алюминий металлидан ишланган ромнинг салобатини ҳис қилиш мумкин. 2015 йилги моделда пластик хомашёсидан фойдаланилган эди.

Металл ром эргономикаси, яъни қиррадорлиги, шаклдорлиги муваффақиятли чиққан. Шу боис ҳам, смартфон кафтга мустаҳкам ўрнашади.  J7 бозорга оқ, қора, тилларанг корпусли талқинларда сотувга чиқарилмоқда.

Телефон аппаратида қисмларга ажратиладиган корпус дизайнининг сақлаб қолингани яхши бўлган. Керак вазиятда уни кўтариб хизмат кўрсатиш марказига чопиш шарт бўлмайди.

Орқа корпус пластикдан тайёрланган ва осонлик билан ечилади. Ичкарида эса   microSIM-карталар учун 2 та бўлмача ва алоҳида қўшимча хотира картаси учун бўлмачани кўрасиз. Сим-картани ўрнатиш учун аккумуляторни ўрнидан олиб туриш керак бўлади.

Samsung Galaxy J7 2016’да аввалги йилги моделдан фарқли равишда, корпуснинг чап ёнидаги овозни бошқариш тугмалари ягона эмас, алоҳида тугмалар кўринишида қилинган. Бу улардан фойдаланишда қулайлик туғдиради.

Корпуснинг ўнг биқинидан эса Ўчириш/ Ёқиш тугмаси ўрин эгаллаган.

Корпуснинг қуйи қисмида 3.5 мм аудио коннектор, microUSB туридаги порт ҳамда микрофон учун жой ажратилган. Микрофонинг битталиги ҳам унинг ҳамёнбоп эканлигини эслатиб туради.

Samsung Galaxy J7 2016’нинг олд панелида ҳам фоточақноқ мавжуд. Шу сабабли ҳам селфи-камерали смартфонлар ичида муносиб ўринга эга. Бир томондан эса бу маркетинг ёндашуви бўлиши мумкин.

Экран тепасида чапдан ўнга томон олд камера, мулоқот динамиги, масофа-оралиқ датчиги, фоточақноқ жойлашган.

Экраннинг қуйи қисмида механик кўринишдаги “Home” тугмаси, сенсор кўринишдаги “Меню” ҳамда “Орқага” тугмалари мавжуд. Ушбу тугмалар экраности ёруғлигига эга эмас.

Корпуснинг том қисми антенна учун қўйилган пластик улоқларни ҳисобга олмаса, бўм-бўш.

Орқа панелдан эса ташқи овоз динамиги, корпусдан бир оз бўртиб чиққан камера туйнуги ҳамда светодиодли фоточақноқ ўрин олган.

Galaxy J7 2016’нинг корпус ўлчамлари 151.7х76х7.8 мм, оғирлиги – 169 граммни ташкил этади. Бу жиҳатдан унинг ўлчами фаблетни эслатади ва бирор ўзига хослик мавжуд эмас. Телефон аппарати етарлича юпқа. Уни синов давомида классик ёки жинси шимда, костюм чўнтагида олиб юрганимда ҳам бирор малоллик туғдиргани йўқ.

Бошқарув элементлари орасида бармоқ излари сканери, ўтказиб юборилган ҳолатлардан бохабар қилувчи индикаторнинг бўлиши мақсадга мувофиқ эди.

Samsung Galaxy J7 2016 корпусининг йиғилиши, деталларнинг ўрнашиши кўнгилдагидай: корпус пишиқ ва мустаҳкам. Аввалги модель билан таққослаганда, бу гал чин маънода “металл гелекси” йиғишга эришилган.

Galaxy J7 2016 телефон аппаратининг алюминий роми атрофи бўйлаб ётқизилган жилодор металл безак қирраси унинг дизайнига хос безак-пардоз ечимига ўзгача нафислик бағишлайди. Орқа панел ҳам худди шундай жилодор металл зиҳга эга.

Металл ром, айниқса ёзнинг иссиқ кунларида қўлга олганда салқинлиги билан ёқимли таассурот уйғотади. У силлиқ бўлса ҳам, сирпанчиқ эмас. Унинг кенг ва аниқ, қиррадор ҳошиялари сабаб телефонни стол устидан ҳар қандай шароитда ҳам осонлик билан қўлга олиш мумкин.

Samsung J7 2016: Дисплей ва экран

Телефон аппаратида SuperAMOLED платформасида ишлайдиган экраннинг  борлиги – бу катта ва аҳамиятли устунлик. Харидорлар ҳали ҳамёнбоп телефонларда бу каби жиҳатга гувоҳ бўлмаган эдилар. Бу кутилмаган совғадай гап. Экран фаолиятини мувофиқлаштирувчи режим мавжуд.

Экран диагонали 5.5 дюйм, унинг пиксель сиғими 1280х720 белгига тенг, яъни ҳар дюймда 267 пиксель. Айтиш керакки, HD сиғим 5.5 дюйм экран учун муносиб ечим. Galaxy J7 (2016)’нинг Full HD сиғим ва 3 ГБ тезкор хотирали талқини Шарқий Осиё бозори учун мўлжалланган.

Телефонда экран ёруғлигини автоматик тарзда мувофиқлаштириб борадиган тизим мавжуд эмас. Кўчага чиқадиган бўлсангиз, “Кўчада” режими сизга ташқи шароитда ҳам телефон дисплейида матн ўқиш, тасвир кўриш имконини беради. Ёки сиз ўзингиз учун қулай бўлган ёруғлик даражасини смартфонга ўрнатишингиз мумкин. Бу тизимдан воз кечилганлик сабабини содда қилиб батарея янада узоғроқ ишлаши учун, деб изоҳлаш мумкин.

“Кўчада” режими ёруғ шароитда ҳам тасвирни аниқ кўриш имконини беради. Бу режим экранни ўчирмасангиз, 15 дақиқагача ишлар экан. Бу режимда экраннинг техник жиҳатлари фойдаланувчига экраности ёруғлигини кенг диапазонда бошқариш, ёруғликни максимал ҳолатда ёруғлик кучи 500 кд/м2’ни ташкил этади. Ўз навбатида, аккумулятордаги қувват истеъмолининг даражаси ҳам кескин кўтарилади.

Гелекси оиласида J7 энг яхши экранга эга смартфонлардан бири ҳисобланади. Шу жиҳати билан у кўпчиликка маъқул келган. Қолаверса, ранг гаммасини қўлда бошқариш функцияси ҳам кўпчилик учуг айни муддао бўлди. Бироқ, ёруғлик даражасини автоматик бошқариш тизими катта камчилик сифатида баҳоланмоқда. Бу аппаратдаги жиддий камчилик.

Samsung J7 2016: Аккумулятор

Юқорида айтиб ўтганимдек, Galaxy J7 (2016) ўзининг кучли аккумулятори билан мақтаниши мумкин. Аккумулятор қўлда ечиб олинадиган. Бу эса кўпчилик фойдаланувчилар учун қулай.

 Li-Ion “қувват тоши”нинг электр токи сиғими 3300 мА соатни ташкил қилади. Аккумулятор тўла қувват олиши учун тахминан 2.5 соат керак бўлди.

Қўлимдаги J7 аппаратини ўрганиш жараёнида унинг “аждоди” бўмиш 2015 йилги талқинни ҳам биратўла тадқиқ қилдим. Маълумотларга кўра аввалгисини тўла қувватлаб,  2 сутка давомида фаол фойдаланиш мумкин бўлган экан. Янги талқинда эса кучлироқ процессорнинг қўйилгани туфайли аккумулятор сиғиининг катталашгани у қадар аҳамият касб этмаса керак, деган хаёлда эдим. Аммо, натижалар мени ҳайратга солди.

J7 2016 телефонининг қувватини 2 мароатаб синовдан ўтказишга мажбур бўлдим. Боиси, бунга тўлиқ ишонч ҳосил қилишим керак эди. MX Player иловаси орқали юқори сиғимли видео тасвирни максимал ёруғлик даражасида кўрганимда тўлиқ қувват 22 соатга туриб берди. Аввалги моделнинг бу борадаги кўрсаткичи 13 соат бўлганини ҳисобга олсак, аккумулятор телефон ҳаётини деярли 2 баробарга узайтирган.

Samsung Galaxy J7 2016’ни 1 дона сим карта билан ишлатиб кўрганимда унинг тўла қуввати 3,5-4 кунга етди. Бу орада 1 ГБ ҳажмидаги маълумот алмашиш, экранниг ўртача экраности ёруғлигида 5 соат ишлаши киради. Айтиш мумкинки, телефон аппаратидан ўртача фойдаланганда смартфон 3 сутка мобайнида сиздан уни қувватлантиришни сўрамайди. Интернетдан фойдаланмай, ўртача мулоқот қилишда фойдалансангиз тўла қувват аппаратга 100 соатга етади.

Ундан юқори даражадаги фаолликда фойдаланганимизда, унинг тўла қуввати 2 суткага етиб берди. Шуниси билан ҳамёнбоп смартфонлар орасида рекорд ўрнатган Samsung Galaxy J7 2016 барчага манзур бўлмоқда.

Телефон аппаратидан фойдаланиш чоғида  билан 3 кунга меҳнат сафарига боришга тўғри келди. Бу жараёнда смартфондан асосан суратга туширишдан фойдаландим ва деярли интернет тармоғига кирмадим. Мулоқот ҳам кунига ўртача 20 дақиқадан ошгани йўқ. Тўртинчи кун уйга қайтиб келиб кўрсам, қувват кўрсаткичи  54 фоизни кўрсатиб турибди.

Кўриб турганингиздек, аккумуляторда қолган 9 фоиз қувват ҳам фавқулодда қувватни тежаш режимида 10 соат 34 дақиқага етиши мумкин. Қувватни оддий ва фавқулодда тежаш режимлари таклиф қилинади. Қурилма асосий қувватини, яъни 29 фоиз қувватни SuperAmoled экрани учун сарфлайди.

Телефон аппаратида қувватни тежашга хизмат қиладиган иловаларни автоматик тарзда ишга туширади. Яъни, агар сиз бирор иловани 3 кун ишлатмасангиз, бу илова ўз-ўзидан қувватни тежаш режимига тушади. Бунда илова қўшимча огоҳлантиришларни кўрсатмаслиги мумкин.

Шунингдек, телефон процессорининг ишлаш тезлгини камайтириш орқали ҳам қувватни тежаш мумкин.

Бу ҳақиқий маънода тежамкор телефонлиги билан ажралиб туради. Ҳатто, ундан фойдаланиш даврида смартфонни ҳар тун уйқудан кетиш олдидан розеткага қўйиш одатидан халос бўласиз.

Samsung J7 2016: Камера

Бош ва олд камера фоточақноққа эга. 2015 йилги талқин олд камера ҳам фоточақноққа эга илк смартфон сифатида шов-шувга сабаб бўлган эди. Шуниси билан телефон аппарати селфи-камерали гаджетлар қаторидан ўрин эгаллаган.

5 мегапикселли камерада олинган суратларни қабул қилса бўлади. Тўғри, уларнинг сифати  Samsung’нинг флагманлари олган суратлар каби ўта сифатли эмас. Бошқа томондан эса, булар бошқа қурилмалар олган суратлар сифатидан устун. Олд камерада ҳам юз ва бошқа эффектларни амалга оширадиган тизимлар мавжуд.

Олд камеранинг ёруғликни қамраб олиши, оқ тус меъёрини аниқлаши, аниқлигида бирор жиддий камчилик мавжуд эмас.

Бош камера 13 мегапикселли. Унинг интерфейси 2015 йилги моделларники каби. Яъни, иловада “Автоматик”, “Пофессионал”, “Панорама”, “Давомли кадр”, “Гўзал юз”, “Овозли кадр”, “Спорт” каби режимлардан бирини танлаш мумкин. Мисол учун, Pro режимида барча, жумладан оқ тус меъёрини қўшиш,  ISO созламаларини мустақил ўрнатишингиз мумкин.

Ташқи, яъни ёруғлик яхши шароитда олинган сурат ёрқин ва деталларнинг аниқлиги билан ажралиб туради.

Синов чоғида олинган суратлардан кўриниб турибдики, ҳамёнбоп смартфонлар орасида Galaxy J7 2016 бош камераси сифатли суратлари билан ажралиб туради.

Бош камера автофокус, тач-фокус (бош тугмани босиб туриб кадрни тиниқлаштириш), юзни аниқлаш, HDR каби тизимларга эга.

Шу вақтга қадар 13 мегапикселли камералар олган бир қатор суратларнинг сифати бу қадар эмаслигига гувоҳ бўлганмиз. Бунинг барчаси кадрларни қайта ишлаш алгоритмининг афзаллиги билан ўлчанади.

Қуйида синов даврида олинган суратларнинг сифатига баҳо беринг.

Galaxy J7 2016’да бу жараён мукаммал амалга ошиб, фойдаланувчига юқори сифатли, тиниқ суратлар тақдим қилинади. Бош камера флагманларга хос 2K эмас, FullHD сиғимли видео тасивр ёза олади. Бу эса кўпчиликни қониқтиради.

Умумий олганда шахсан мен Galaxy J7 2016’нинг камера “ижоди”га яхши баҳо бераман. Хулоса қилиб айтиш мумкинки, ҳар иккала камера яхши суратга олади.

Samsung J7 2016: Коммуникация имкониятлари

Samsung Galaxy J7 2016 ҳамёнбоп гаджет сифатида ўз фойдаланувчиларига алоқанинг 2G, 3G, 4G, GPRS, HSPA, EDGE, LTE тармоқ хизматларини кўрсатади. Унда Bluetooth 4.1, Wi-Fi 802.11 b/g/n, USB 2.0, GPS/ГЛОНАСС каби симсиз маълумот алмашиш тармоқларидан фойдаланиш мумкин. Шунингдек, NFC яқин масофада туриб контактсиз алоқа ўрнатиш технологияси тўловни карточкасиз тўлаш имконини беради. Аппарат LTE cat.4 тармоғини ҳам қўллаб-қувватлайди ва бехато ишлайди.

Samsung J7 2016: Процессор, платформа ҳамда самарадорлик

Exynos 7870 процессори 8 ядродан биорат ва унинг частота тезлиги 1.6 ГГц.гача кўтарилади. Телефонда Mali-T830  график процессори ўрнатилган.

Exynos 7870 процессори Galaxy J7 2015’даги 7580 моделининг такомиллашган талқини ҳисобланади. Янги процессор 14 нанометрли техник жараёнга асосланган. Samsung вакиллари маълум қилганларидек, процессор чиндан ҳам энерготежамкорлиги билан ажралиб туради.  Ҳозирча Galaxy J7 (2016) илғор Exynos 7870 “электрон юраги”га эга ягона смартфон.

Mali-T830 MP2 видеокартаси эса ҳамёнбоп смартфонларда кенг татбиқ этилаётган график-тасвир процессоридир. Бу аввалги моделда татбиқ этилган видеокартадан бир оз кучлироқ.

Galaxy J7 (2016) график-тасвирга бой ўйинларни ҳеч “бир қотиб қолишлар”сиз ўйнаш мумкин бўлган смартфон. Унда Riptide GP2, Asphalt 8 каби видео ўйинларни бемалол ўйнаш мумкин.

Биз ўрганган талқин оператив хотирасининг сиғими 3 ГБ. Шунингдек, Хитойдан ташқари  бозорга мўлжалланган смартфон талқини 2 ГБ хотирага эга. Бу ҳамёнбоп смартфонлар учун ўта замонавий ечим ва юқори илғорлик дегани.  Galaxy J7 2015 йилги талқин эса 1,5 Гбайт оператив хотирага эга эди.

Телефон аппарати тезкор фаолиятга эга, иловаларни зудлик билан очиб, узлуксиз ишлай олади, бирор қотиб қолишлар кузатилмайди. Телефонни 2 ҳафта мобайнида синовдан ўтказган бўлсам, унинг фаолиятига фақатгина тезкор деб баҳо бериш мумкин. Ҳамёнбоп гаджет бўлса ҳам, тезкорлиги унча-мунча флагманларникидан қолишмайди.

Унинг доимий ички хотираси  – 16 ГБ бўлиб, фойдаланувчи учун 10.8 ГБ ажратилади. Шу билан бирга, 128 ГБ маълумот кетадиган қўшимча хотира картасини ўрнатиш мумкин.

Платформа, процессор ва хотира борасида хулоса қиладиган бўлсак, янгича процессор, катта “оперативка”га эга смартфон самарадорлиги юқори.

Samsung J7 2016: Операцион тизим ва дастурий таъминот

Айтиш керакки, Galaxy J7 2016 компания флагманларда татбиқ этадиган дастур ва операцион тизимдан баҳраманд бўлган илк ҳамёнбоп смартфондир. У Android 6.0.1 операцион тизимининг мослаштирилган TouchWiz тизими бошқарувида ишлайди.

Мени ўзига жаб қилган жиҳатларидан бири бу – операцион тизимда флагман телефон аппаратларига хос Smart Manager функциясининг татбиқ этилгани бўлди. Маълумки, хотирани бошқариш, кераксиз файлларни кўриш, оператив хотирани тозалаб туриш ва шу орқали смартфоннинг янада тезкор ишлашига эришишда бу айни зарур функция ҳисобланади.

Аппарат тизимида FM-радиоси бўлиб, яхши ишлайди ва эфирни телефон хотирасига ҳам ёзиб олиш мумкин.

Samsung J7 2016: Нарх-наво ҳамда рақобат

Айни кунда Samsung Galaxy J7 (2016) халқаро бозорда ўртача 220-240 АҚШ долларидан сотилмоқда. Юртимизда ҳам унинг нархи 200-250 АҚШ долларини ташкил қилади.

Meizu M3 Note смартфон бозорида Galaxy J7 (2016)’га рақиблик қилиши мумкин. Ҳамёнбоп нархли Meizu смартфони ҳам 5,5 дюймли ҳамда Full HD сиғимли IPS-экран, 8 ядроли MediaTek Helio P10 (MT6755), Mali-T860 MP2 видеокартаси ва 2 гигабайтли оператив хотираси, 16 гигабайт доимий ички хотира, 4100 мА*соат аккумулятор,  SIM-карт ва қўшимча хотира картасини ўқийдиган гибрид бўлмачалар,  GPS /ГЛОНАСС тизимлари ва LTE’ни қўллаб-қувватлайдиган тизимга эга.  Galaxy J7 (2016) билан солиштирганда айтиш мумкинки, Android 5.1 талқинига эга Meizu M3 Note кореялик смартфонга ютқазиб қўяди. Шунингдек, 4100 мА соат қувват ҳам узоқ ишлашда Galaxy J7 (2016)’нинг 3300 мА соат сиғимли “қувват тоши”га ютқазиб қўяди.

Samsung J7 2016: Таасcурот ва хулосалар

Икки ҳафта давом этган синов-фойдаланиш жараёнида Samsung J7 2016’нинг алоқа сифати билан боғлиқ бирор камчиликка дуч келганим йўқ. У ҳам Samsung компаниясининг бошқа телефонлари қаторида юқори сифатга эга.

Иш бор жйода камчилик бор, албатта. Жумладан, аввалги талқинда бўлгани каби, Samsung Galaxy J7 (2016)’да ҳам шовқинни пасайтирадиган тизимнинг татбиқ этилмагани у қадар ҳам қувонарли эмас.  Лекин, ҳамёнбоп смартфонлар оиласи учун бу етарлича сифатли.

Қолаверса, телефоннинг қўнғироқ овози, яъни ташқи динамик карнайининг овози ўртачадан бир оз пастдек таассурот қолдирди. Баъзида қўнғироқларни эшитмай қолган пайтларим ҳам бўлди.

Металл ром, SuperAmoled экран, олд ва орқа панелдаги безак зиҳлари, икки баробарга узайган аккумулятор фаолияти, илғор Android’нинг сўнгги талқини, ёрқин ва аниқ сурат оладиган камера сизни қувонтирса, микрофоннинг битталиги, экраности ёруғлигини автоматик созлайдиган тизимнинг мавжуд эмаслиги ким учундир камчилик бўлиши мумкин.

Доимгидек, сўнгги танлов, бу – сизнинг хоҳишингиз. Доимо бозорингизни берсин!