20 йил хорижда ишлаб келган Отабек Назиров Инновация вазири ўринбосари этиб тайинланди
Отабек Назиров бошқарув компаниялари, инвестицион ва венчур компаниялари, шунингдек банклар ва консалтинг фирмалари вакиллари билан учрашув ўтказди.
Мазкур тадбир венчур фондлари, бошқарув компанияларини ташкил қилиш ҳамда Инновацион корхоналарга инвестицияларни жалб этишнинг ҳуқуқий мезонлари ва тартиблари ҳақидаги меъёрий-ҳуқуқий лойиҳаларни тайёрлаш бўйича ишчи гуруҳи фаолияти доирасида ўтказилди.
Учрашувда Orient Capital Management, Silk Capital, InfinBank, Avestа Investment Group, IFG Capital, Сentil, PWC каби компаниялар вакиллари иштирок этди.
Эслатиб ўтамиз. Отабек Назиров АҚШнинг Нью-Йорк штати Университетида макроиқтисодиёт бўйича таълим олган ва 20 йил давомида хорижий давлатларда ишлаб келган. Ёш мутахассис даставвал АҚШда Goldman Sachs Group, The Avascent Group, JPMorgan Chase каби молия ва инвестиция компанияларида фаолият юритди. Отабек Назиров Россияда МДМ-Банк ҳамда «Тройка Диалог» компанияларида ҳам ишлаган.
Охирги пайтда Отабек Назиров Лондонда Европа тикланиш ва тараққиёт банкида саноат секторига инвестицияларни киритиш бўлимининг бош ҳудудий банкири лавозимида ишлаган.
Отабек Назиров янги лавозимда монетар сиёсат, банк тизими, бюджет сиёсати, солиқ тизими, ижтимоий хизматлар, пенсия таъминоти, қишлоқ ва сув хўжалигини ривожлантириш, шунингдек демография ва аҳоли бандлигини тадқиқ этиш бўйича инновацион ечимларни ишлаб чиқиш ва амалиётга татбиқ қилиш масалалари билан шуғулланади.
