Афсонавий смартфонлар? iQOO 11 ва 11 Pro тақдим қилинди!

Vivo компаниясининг iQOO бренди ўзининг янги авлод флагманлари: iQOO 11 ва iQOO 11 Pro смартфонларини тақдим қилди. Айтиш керакки, моделларнинг иккаласи ҳам бир-бирига жуда ўхшаб кетади. Масалан, иккала моделлар ҳам 6,78 дюйм ўлчамдаги 1440х3200 пиксел резолюцияли Samsung E6 AMOLED дисплейига эга. Унинг максимал янгиланиш тезлиги 144 герц бўлиб, бу ажойиб натижага смартфонларга ўрнатилган V2 чипи сабаб бўлади ёхуд у юқори кадр тезлигини қўллаб-қувватлайди ва ўйин самарадорлигини оширади. Агар смартфонлар экран борасида фарққа эга бўлса, бу уларнинг ён томонлари эгилганлиги даражасига қараб бўлади: Pro модел ён томонлари эгилган экранга эга бўлса, оддий модел экрани шунчаки 2.5D дизайнга эга.

Капот остида иккала моделлар ҳам янги чиққан Snapdragon 8 Gen 2 чипида 8/12/16 ГБ оператив хотира билан ишлайди. Агар RAM етмайди десангиз, унда уни Extended RAM 3.0 технологияси билан яна 8 ГБ гача кенгайтириб олишингиз мумкин. Камераларга келган кичик фарқларни кўриш мумкин. Оддий модел 50 мегапикселли Samsung GN5 асосий, 13 мегапикселли 3х "портрет" ва 8 мегапикселли ултра-кенг камерага эга бўлса, Pro модел 50 мегапикселли Sony IMX866, 50МП ултра-кенг ва 13МП 3х "портрет" камералари билан фарқ қилади. Улар 4К форматида видеога олишни қўллаб-қувватлайди. iQOO 11 смартфонларини батареясига қараб ҳам ажратиб олиш мумкин. iQOO 11 модели 5,000 мА/с батареяси 120 Вт тезликда зарядланса, Pro моделнинг 4,700 мА/с батареяси 200 Вт тезликда қувватланади.

Хитойда iQOO 11 Pro учун бошланғич 4999 юан ёхуд 8 миллион сўм атрофидаги нархда буюртма бериш аллақачон бошланган. Оддий модел эса Индонезия ва Малайзия учун тақдим қилинган бўлиб, унинг нархи 6,100,000 сўмдан бошланади.

ЎҚИНГ: Xiaomi 13 сериясининг тақдимот санаси қайта белгиланди!