Android асосчисининг компанияси «ақлли» кўзойнак учун патент олди
Android платформаси яратувчиларидан бири – Энди Рубин раҳбарлигидаги Essential компанияси смарт-кўзойнак ишлаб чиқариши мумкин. Бу ҳақда Patently Apple ҳамда The Verge маълумотларига таянган ҳолда 3DNews – Daily Digital Digest нашри хабар бермоқда.
Patently Apple мутахассислари томонидан топилган патент аризаси шунга гувоҳлик бермоқда, дейилади хабарда. Аризада стандарт кўзойнак форматидаги, аммо ички камера ва дисплей ўрнатилган қурилма концепти тавсифланади.
Snapchat компаниясининг Spectacles қурилмасига ўхшаб, Essential’нинг янги патентлаган гаджети ҳам ўзига ўрнатилган камера ёрдамида фото ва видео тасвирга олиш учун қўлланади. Шу билан бирга, худди Google Glass сингари, Essential «ақлли» кўзойнаги ҳам қандайдир турдаги тўлдирилган реаллик технологияси ёрдамида ҳақиқий борлиқни рақамли ахборот ҳамда тасвирлар билан тўлдиради.
Ҳужжатда тавсифланган қурилма рецептур, фотосезгир ва қуёшдан ҳимояловчи линзалар билан жиҳозланган. Шунингдек, унда «икки режимли дисплей» тўғрисида ҳам гап боради; у кўзни текшириш учун ичкарига қаратилган камерани қўллайди.
Шунингдек, патент мазкур кўзойнакни тўлдирилган реаллик (тўлдирилган борлиқ) қурилмаси сифатида ҳам қўллаш мумкинлигини таърифлайди. Масалан, у реал вақт режимида дўкондаги нархларни ўзаро таққослаши мумкин.
«Атрофдаги – фойдаланувчи кўриб турган реал борлиқ асосида, унинг нигоҳи йўналишига боғлиқ ҳолда, процессор унинг атрофини тўлдириш учун тасвирлар қўша олади, – дейилади ҳужжатда. – Масалан, агар фойдаланувчи маҳсулотдаги штрихкодга қараса, қурилма айни шу номдаги маҳсулотни бошқа дўконларда арзонроқ харид қилиш вариантларини кўрсатиши мумкин».
Wired ресурсига берган интервьюсида Рубин Google Glass смарт-кўзойнагини тилга олиб ўтган. Унингча, бу қурилманинг «муваффақиятсиз чиқиши сабаби – технологиянинг ўзи ёмон бўлганида эмас, балки дунё ҳали унга тайёр бўлмаганида». Афтидан, ўз компанияси «ақлли» кўзойнагини оммалаштириш борасида Рубиннинг ўз ғоялари ҳам бўлса керак.
Эслатиб ўтамиз, куни кеча – 30 май куни бу компания титан корпусли смартфон – Essential Phone’ни тақдим қилган эди.
