Apple iPhone эгаларига 50 долларлик чегирма берди
Американинг Apple компанияси эски iPhone смартфонларининг тезкорлигини секинлаштириб қўйгани учун расман кечирим сўраб, ишқибозларига мурожаат қилди. Гарчи, компания смартфоннинг узоғроқ ишлашини кўзлаб шундай қилганини айтган бўлса ҳам, бу қилмиши учун қаттиқ танқид остига олинди.
Apple тез орада бу айфонларнинг батареясини алмаштириш ва батарея ҳолатини назорат қилиб боришга ёрдам берадиган дастурий таъминот ишлаб чиқишга ваъда берди.
Жабрланувчиларнинг ҳамда айрим судларнинг фикрларига кўра, Apple бу орқали фойдаланувчиларни янги айфон олишга мажбур қилган ва руҳий тазйиқ ўтказган.
Apple бир авлод аввалги iPhone'ларнинг платформаси секинлаштирилишини тан олган ва буни айфондаги аккумулятор вақт ўтиши билан иш самарадорлигини йўқотиши билан изоҳлаган.
"Биз фойдаланувчиларимизга имкон қадар энг яхши имкониятларни яратишга ҳаракат қиламиз. Смартфон самарадор бўлиши билан бирга, узоғроқ хизмат ҳам қилиши керак. Литий батареялар вақт ўтиши билан кучсизланади ва смартфоннинг совуқда ҳамда қуввати паст шароитда ишлашини таъминлай олмайди ", - дейди Apple ўзининг аввалги баёнотида.
Apple'нинг расмий сайтида эълон қилинган янги баёнотга кўра, энди компания кафолат муддати ўтиб кетган айфонларнинг аккумуляторларини алмаштириш хизматини 50 долларга, яъни 79 доллардан 29 долларга арзонлаштирган. iPhone 6 ёки ундан аввалги айфон фойдаланувчилари бу чегирмадан фойдаланишлари мумкин.
Компания бу орқали ўз мижозлари учун қанчалар қайғураётганини кўрсатмоқчи бўлса ҳам, айни пайтда АҚШ да бу можарога дахлдор 8 та, шунингдек Исроил ва Францияда ҳам суд ишлари давом этмоқда.
