Apple ноқонуний келишувда айбланмоқда
Россия Монополияга қарши федерал хизмати (Федеральная антимонопольная служба – ФАС) Apple’нинг мамлакатдаги шўъба корхонасини iPhone 5 ва 6-сериялари нархлари борасида ноқонуний келишишда айбламоқда. RNS ахборот агентлигининг хабар беришича, ташкилот «Эппл Рус» МЧЖни рақобатни ҳимоя қилиш тўғрисидаги қонунни бузганликда айбдор деб топган.
«Эппл Рус» МЧЖга нисбатан жиноий иш ўтган йилнинг август ойида очилган эди. Apple’нинг Россия ҳудудидаги расмий вакили монополияга қарши қонунчиликни бузганликда ва мамлакат ҳудудида iPhone’ларни сотишда нархлар борасида ноқонуний келишиб олишда айбланган.
Тергов учун асос бўлган омил – Apple смартфонларининг нархлари асосий ўн олтита реселлер: МТС, М.Видео, Билайн, Эльдорадо, Евросеть, OZON, Re:Store, Связной, Мегафон, Юлмарт, Media Markt, Ситилинк, Холодильник.ру, DNS, ИОН (Ноу-Хау), Техносила тизимларида айнан бир хил тарзда белгиланганлиги ҳақидаги фуқароларнинг мурожаати эди, дейилади хабарда.
Apple’нинг бошқа мамлакатлардаги шўъба корхоналари – Apple Holding B. V., Apple Sales Ireland, Apple Operations International ва Apple Inc. кабиларга нисбатан очилган ишлар ёпилган, чунки уларнинг фаолиятида монополияга қарши қонунчиликни бузиш ҳоллари аниқланмаган.
Қарор тўлиқ ҳажмда тайёрланганидан кейин уч ой муддат ўтиб, «Эппл Рус» МЧЖга бу масалада ҳакамлик судига шикоят қилиш ҳуқуқига эга, дея таъкидлайди RNS. Жарима масаласи эса алоҳида кўриб чиқилади, унинг миқдори 5 миллион рублни ташкил этиши мумкин.
Эслатиб ўтамиз, Apple маҳсулотларининг Тошкентдаги нархлари бўйича сайтимизнинг тегишли бўлимидан маълумотларни олишингиз мумкин.
