АҚШ да Huawei'га қарши қонун лойиҳаси ишлаб чиқилди. Ҳукумат нимадан чўчимоқда?
Яқинда поёнига етган CES 2018 кўргазмасига борар экан, Huawei компанияси раҳбари Лас-Вегасда ишонч билан компаниянинг АҚШ бозорига киришини эълон қилишни ўз олдига бош мақсад қилиб қўйган эди. Бироқ, АҚШ ҳукумати "тепаси"да турганлардан кимдир сўнгги дақиқаларда бу келишувни бекор қилди.
Бунинг сабаблари кўп бўлиши мумкин. Хусусан, АҚШ ҳукуматининг кибер ва ахборот хавфсизлиги масаласида Huawei компаниясига нисбатан ишончсизлиги. АҚШ Сенати аъзоларидан бири 2 та хитойлик бренд маҳсулотларини АҚШ ҳудудида тақиқлашга оид қонун лойиҳасини ҳам тайёрлаган. Унда Huawei ва ZTE компанияларининг телекоммуникация ускуналаридан АҚШ даги ҳукумат бинолари ва ташкилотларида фойдаланишнинг чекланиши баён этилган.
Шу кунларда мазкур қонун лойиҳасининг кўрилиши ва қабул қилиниши аниқ бўлиб колди. Бунинг асосий сабаблари қаторида мамлакат ҳудудида кибер жосусликка қарши курашишдан иборат. Маълумотларга кўра, бу икки бренд Хитой ҳукумати учун ишлайди.
Huawei янги авлод алоқа технологияси бўлган 5G тармоғини ривожлантириш бўйича ҳам илмий изланишлар олиб бормоқда ва бу йўналишда етакчилардан ҳисобланади. 5G тармоғини қуриш америкаликларнинг ҳам бош мақсадига айланган. Бунда эса имкон қадар маҳаллий ишлаб чиқарувчилардан фойдаланган маъқул. Ҳукумат вакилларининг фикрича, истиқболда Хитой билан содир бўлиши мумкин бўлган кибер урушларга ҳозирданоқ тайёр туриш лозим.
Бундан ташқари, конгрессменлар ва АҚШ ҳукумати Huawei компаниясининг жаҳон миқёсидаги нуфузи тобора мустаҳкам бўлиб бораётганидан ҳам хавотирда. Буни эса тўхтатб қолишнинг чораларини кўриш керак.
Бошқа бир сабаб сифатида маҳаллий ишлаб чиқарувчилар ва компанияларни қўллаб-қувватлашни айтиш мумкин. Айни пайтда Huawei телекоммуникация соҳасида (4G технологияси учун қурилмалар етказиб беришда) етакчи ҳисобланади ва унинг жаҳон миқёсидаги улуши 29% ни ташкил қилади. Шунингдек, телекоммуникация қурилмалари бозорида Nokia (26%), Ericsson (24%), ZTE (12%) ва Samsung (5%) компаниялари ҳам пешқадам. Бу борада АҚШ нинг Cisco компаниясига суяниш мумкин. Экспертларнинг фикрича, ҳукуматнинг бу қарорида Cisco компаниясининг ҳам "таъсири" бўлиши мумкин.
