АҚШ нинг "қора рўйхати"да «Касперский Лабораторияси» асосчиси ҳам бор

АҚШ нинг

2018 йилнинг 29 январида АҚШ Ғазначилиги санкция қўлланилиши мумкин бўлган россиялик олигархларнинг "қора рўйхати"ни эълон қилди. Кўзга кўринган шахслар орасида йирик бизнесменлар ҳам, сиёсатчилар ҳам бор.

Мазкур рўйхатни шакллантириш мезонлари қаторида Россия фуқароларининг бойлиги муҳим аҳамият касб этади. Яъни, унга айланма маблағлари бир миллиард доллардан ошган фуқаролар киритилган.

Россияга қарши қаратилган мазкур эълон, гарчи рус миллиардерларига қарши бирор тақиқ ёки жазонинг қўлланилишини англатмаса ҳам, унинг ошкора эълон қилиниши россиялик таниқли шахсларнинг банклар ва ҳамкорлари олдидаги нуфузларига салбий таъсир кўрсатади.

Бу инсонлар орасида бош вазир Дмитрий Медведев ёки энергетика вазири Александр Новак қаторида, Кремлдан ҳам узоқ бўлган инсонлар бор. Жумладан, ахборот технологиялари соҳасида фаолият олиб бораётган бизнесменлар ҳам.

Улар орасида «Касперский Лабораторияси» асосчиси Евгений Касперский, «Яндекса» асосчиси ва бош директори Аркадий Волож бор.

"Америка сиёсатдонлари ўйлаб ҳам ўтирмасдан барча йирик бизнесменларни, амалдорларни бу рўйхатга киритганлар. Бундан кўзланган мақсад — Россия ва бу ердаги тадбиркорлик муҳитига қарши босимни кучайтириш ва бу орқали мамлакатда сиёсий беқарорликни келтириб чиқаришдан иборат", дейди иқтисодчи Владимир Тихомиров.