АҚШ собиқ агенти Twitter'ни сотиб олмоқчи: мақсади эса ҳайратомуз

Twitter тармоғи таниқли шахслар ва давлат арбобларининг фикр-мулоҳазалари учун глобал платформадир. Жумладан, АҚШнинг амалдаги президенти Дональд Трамп таниқли шахс, кино ва мусиқа оламидаги машҳур санъаткорларга, журналистларга қаратилган, шунингдек уруш қўзғаш мазмунидаги таҳдидли твитлари билан яхши танилган.      

Яқиндагина биз жаноб Тампнинг биргина сўзи билан Amazon катта миқдордаги зрара кўргани ҳақида хабар берган эдик. Давлат раҳбарининг Twitter тармоғидаги чиқишлари кўпчиликнинг жиғига тегаётган кўринади.

АҚШнинг GoFundMe платформасида бошланган янги кампания Twitter'ни сотиб олиб, ундаги Дональд Трампнинг саҳифасини ёпиб ташлашни мақсад қилган. Барча хоҳловчилардан бунинг учун очилган ҳисоб рақамига пул ўтказиши мумкин.

Бу кампания бошида АҚШ Марказий разведка бошқармаси собиқ агенти  Валери Плейм турибди. Ҳозирча у 13 минг АҚШ доллари тўплашга эришган. Валерининг айтишича, лойиҳадан 1 млрд доллар тўплашга умид қиляпти.

"Дональд Трамп Twitter'ни ўзининг қуролига айлантирди. Глобал платформадаги унинг биргина фикри халқаро муносабатлар ва молиявий ҳолатга жиддий зарар етказмоқда. Кимдир уни тўхтатиб қолиши керак", дейди собиқ разведкачи.

Эслатиб ўтамиз, жаҳоннинг энг йирик ижтимоий тармоқларидан бўлган Twitter’нинг ҳозирги қиймати $12 млрд долларни ташкил қилади.