Asus Apple'ни масхара қилгани учун қораланди
Apple корпорацияси 2017 йилнинг кузида iPhone X флагманини тақдим қилганида кўпчилик компаниялар янги смартфон моделининг олд панелидаги ўйиқни кўриб "Олма"нинг куни битганини башорат қилишган эди.
Бироқ, кўп ўтмасдан янги айфон муваффақиятидан илҳом олган айрим смартфон ишлаб чиқарувчилари айнан iPhone X моделига ўхшаш девайс яратишга киришиб кетдилар.
Шулардан бири ASUS бренди бўлиб, куни кеча iPhone X смартфонига бир томчи сувдек ўхшаб кетадиган ZenFone 5 моделини тақдим қилди. Бу гаджет олд панелида ҳам ўйиғи ва унда камера мавжуд.
Asus Apple'нинг "байроқдори"даги ўйиқ анча бесўнақай эканини, янги смартфонининг олд панелидаги ўйиқ анча ихчамлигини айтиб мақтанди.
Хусусан, ZenFone 5 тақдимоти чоғида намойиш қилинган махсус роликда Asus унинг девайсидаги ўйиқнинг iPhone X'никидан 26% га кичикроқлигини, натижада унинг смартфонидаги дисплей майдони 4% га катталашганини эълон қилди.
Экспертларнинг фикрича, IT-саноатда нуфузга эга Asus компаниясининг iPhone X дизайнини очиқчасига ўғирлаши, устига-устак Apple'ни масхаралаши унинг обрў-эътиборига салбий таъсир кўрсатиши аниқ.
