Бармоқ изи сканери экраннинг ўзига жойланган илк смартфон тақдимотига атиги бир ой қолди!
Экрани олд панелни тўлиқ эгаллаган смартфонлар трендга чиққач, дактилоскопик сканерни шу дисплейнинг ўзига ўрнатиш технологияси устида ҳам ишлар жадаллашди. Бу борада илк амалий натижаларни турли етакчи смартфонсозлардан кутишди, бироқ шу пайтгача бирорта флагманда мазкур технологияни кўрмадик. Кеча эса Synaptics компанияси Clear ID FS9500 – бармоқ изини оптик йўл билан сканерловчи датчикларни оммавий ишлаб чиқара бошлаганини эълон қилди.
ЎҚИНГ: Мутлақо ромсиз смартфонни умуман танилмаган бир компания яратди (+видео)
Бундай сенсорлар асосан ромсиз экранли смартфонларда қўлланади ва дисплейнинг остига жойланади. Мазкур сканер экран билан интеграциялашади ва керакли пайтда фаоллашади.
Ишлаб чиқарувчининг сўзларига кўра, фойдаланувчининг шахсини тасдиқлашнинг бошқа усулларига қараганда Clear ID датчиги тезроқ ишлайди. Шунингдек, SentryPoint технологияси эвазига у юқори даражада ишончлиликни ҳам таъминлайди. Фойдаланувчи смартфон экранига тегиши билан у биометрик аутентификацияни амалга оширади, дейилади хабарда.
Тўғри, экранга ўрнатиладиган дактилоскопик датчик ҳақида турли хабарлар, суратлар тарқалмоқда, бироқ шу пайтгача мазкур технология оммавий жорий этилган бирорта ҳам қурилма расман намойиш қилинмаган.
ЎҚИНГ: Apple ва Samsung уддалай олмаган технологияни Vivo амалга оширди
Synaptics ваъдасига қараганда, Clear ID сенсорига эга, истеъмолчилар учун оммавий ишлаб чиқариладиган биринчи смартфон тақдимотига ҳам жуда оз вақт қолган. Келаси йилнинг 9–12 январь кунлари Лас-Вегас шаҳрида бўлиб ўтадиган CES 2018 кўргазмасидаёқ шундай қурилмани расман намойиш этишади. Тадбирга эса бир ойдан озроқ вақт қолган, демак, уни кутиш учун яна битта сабаб бор!
