Бенчмаркда Galaxy Note 9 илк бор кўриниш берди
Galaxy S9 тақдим қилиниши билан Samsung компаниясининг мобил бўлинмаси навбатдаги жиддий флагманни такомиллаштиришга шўнғишган кўринадилар. Боиси, сўнгги тақдимотдан бир кун ўтиб, навбатдаги Galaxy Note 9 флагмани қурилмалар салоҳиятини аниқлайдиган бенчмаркда кўриниш берди.
Бенчмарк натижаларига кўра, Samsung Galaxy Note 9 янги авлод фаблетларига хос бўлган инновацион жиҳатлар билан таъминланган. Шунингдек, унинг 555 баллдан 522 балл тўплагани ҳам эълон қилинган.
Жумладан, "SM-N960U" ишчи рақами билан намоён бўлган Galaxy Note 9 талқинидан келиб чиқиб, Qualcomm’нинг бу йилги ва шу вақтга қадар ишлаб чиқарган энг илғор Snapdragon 845 чипсети ёки Samsung’нинг Exynos 9810 чипсетига эга бўлади.
Galaxy Note 9 учун танланган 6.3 дюймли OLED экран ҳозирги "байроқдор"лардан бир оз йирик ва Galaxy Note 8 билан деярли бир хил бўлади ҳамда экраннинг томонлар нисбати 18.5:9 ўлчамида тайёрланади. Мазкур флагман ҳам компаниянинг сўнгги тенденциялари асосида Galaxy S9 каби "Infinity Display" билан таъминланади.
Galaxy S8 савдога Android 7.0 Nought тизимида чиқарилган ёки Galaxy Note 8 қадоқдаёқ Android 7.1 тизимига эга бўлган бўлса, шу йилнинг кузидан сотувга чиқариладиган Galaxy Note флагмани инновацион Android 8.1 Oreo операцион тизими ўрнатилган ҳолда харидорларга етказиб берилади.
Маълумотларга кўра, Galaxy Note 9 девайси ромдан тўлиқ холи бўлади. Олд панелнинг 98 фоизини экран ташкил қилади.
Galaxy Note 9 модели ҳам Galaxy S9 каби камера технологияси, жумладан "Super Slow-motion", яъни секинлаштирилган видео тасвирга олиш технологияси билан ўзига хос бўлади. Яна бир муҳим жиҳати, ушбу фаблетнинг бармоқ изи сканери виртуал бўлади ва дисплейга жойлаштирилади.
Анъанага кўра, Samsung Galaxy Note 9 июль-август ойларида, яъни янги айфон флагмани тақдимотидан бир фурсат аввал намойиш қилинади.
Galaxy Note 9 жаҳон смартфон бозорларига ўртача 1,400 АҚШ доллари баҳосида, яъни Galaxy Note 8 моделидан 200 доллар қимматга сотувга чиқарилади.
