Blackberry Messenger иловасининг Tizen версияси чиқарилади

Blackberry Messenger иловасининг Tizen версияси чиқарилади

Blackberry Messenger иловаси бир қатор қулай функцияларга эга бўлгани боис, ўз вақтида айнан у сабаб кўплаб истеъмолчилар Blackberry маркасидаги смартфонларни харид қилишган.

Ҳозир Blackberry смартфонлари жуда кам миқдорда тайёрланади, компаниянинг ўзи эса бундан буён смартфонларни ишлаб чиқиш соҳасига маблағ ажратмасликка қарор қилган. Ҳозирда Канада компанияси, асосан, дастурий таъминот ва сервислар яратишга эътибор қаратмоқда. Шунинг учун бўлса керак, Blackberry ўзига қарашли машҳур сервисларни бошқа платформаларга интеграция қилишга ҳам рози бўлмоқда. Масалан, бу гал компания Blackberry Messenger иловасининг Tizen версияси чиқарилишини тасдиқлаган, деб ёзмоқда Phone Arena сайти.

Маълумки, Samsung ва Intel томонидан яратилган Tizen операцион тизими ҳозирча унча ҳам яхши оммалашмаган. Айни пайтда мазкур платформада ишлайдиган кам сонли Samsung смартфонлари баъзи мамлакатлардагина сотилади, холос.

Индонезия Blackberry Messenger сервиси машҳур бўлган мамлакатлардан бири ҳисобланиб, ҳозирда ушбу давлат учун Tizen дастурига мўлжалланган махсус Blackberry Messenger иловаси ишлаб чиқилмоқда. Бу эса ўз навбатида ушбу дастур остидаги Samsung смартфонларининг сотувига ижобий таъсир кўрсатиши мумкин.