Браузер орқали ўйналадиган ўйинлар
Баъзан ишдан безиб, фикру хаёлимизни бир оз чалғитиш истаги туғилади. Компьютер ўйинларига ишқибоз бўлсак, бўш вақтдан фойдаланиб, дарров ўйинга бериламиз. Лекин компьютер ўйинлари жонга теккан бўлса, нима қилиш мумкин? Биз ана шундай вазиятда сизни нафақат бир соат, балки кунлаб ўзига ром этиши мумкин бўлган браузер ўйинларини тавсия этамиз. Ҳозирча эса излаш учун вақтни тежаш мақсадида энг яхшилари бўлмаса-да, зериктирмайдиган ўйинлар билан танишинг:
Тахтлар жанги
«Play» тугмачасини босиши билан ўйинчи дарҳол ўн йил ортга – “Шамшир ва жоду қаҳрамонлари” даврига қайтади (агар у 13 ёшли ўқувчи бўлмаса, албатта). Ўйин воқеалари эртакдаги Штормфолл қироллигида бўлиб ўтади. Қироллик оғир кунларни бошидан кечирмоқда: ер эгалари бош кўтаришган ва уларнинг ҳар бири худди сиз яхши биладиган сериалдаги каби тахтни эгаллаш истагида. Ўйин кичик ерлардан бошланади, биринчи галда уларни гуллаб-яшнаган қасрларга айлантириш керак. Акс ҳолда рақиблар уларни вайрон қилади. Ўйин схемаси оддий: манбалар тўпланади, ривожланилади, монстрлар ўлдирилади, тажриба тўпланади.
Шундан кейин қўрқмасдан ўзгаларнинг қасрларини босиб олиш, вайрон қилиш, талон-тарож этиш учун йўлга чиқса ҳам бўлади. Аммо фронт орқасини ҳам унутмаслик керак, чунки ҳар хил Грейжойлар орқадан ҳужум қилиб қолиши мумкин. Битта ўзи ўйнашни ёқтирмайдиганлар учун яратувчилар Альянсларни яратишган бўлиб, уларда дўстлар елкама елка туриб жанг қилишади. Ўйиннинг илк босқичларида лорд Оберон яхши маслаҳатгўй бўлади: у қандай қилиб бонуслар ишлаш, сафони яхшилаб олиш ёки тўла экранли режимга ўтиш кабилар тўғрисида йўл-йўриқ кўрсатиб туради.
Хулоса: жанр талабларига жавоб берадиган қизиқарли ўйин. Шу билан бирга, графикаси ҳам жойида – “Plarium”да рассомга пулни аяшмагани шундоққина билиниб турибди.
Юлдузлардан келган шарпалар
Ўтмишдан келажакка ўтамиз – бу ўйинда ҳарбий космик кема капитани сифатида само кенгликларида уни моҳирона бошқариш талаб этилади. Бунинг учун дастлаб фракцияни танлаш керак – ўйинчи унинг таркибида янги сафдош бўлади. Улар сони эса учта: “Титан”, “Аврора” ва “Феникс”. Аслида улар бир-биридан у қадар ҳам фарқ қилмайди. Асосий фарқ қарашларда ва космик кемаларининг ташқи кўринишида.
Бошланишида ўйинчига оддийгина, биринчи зарбадаёқ сочилиб кетиши мумкин бўлган “кема” берилади. Қизиғи, ўқ ота олмайди, хуллас, бир амаллаш керак. Аммо вақт ўтиб, бу “шалдироқ арава”ни сизнинг ташқи сиёсатингизни маъқулламайдиган ҳар қандай рақибнинг ақлини шоширадиган ҳақиқий линкорга айлантириб олиш мумкин. Ёки бошқа яхшироқ кема сотиб олиш варианти ҳам бор. Бу ўйиндаги энг қизиқарли ва ўзига жалб қиладиган нарса – яқинингизда бошқа космик кема пайдо бўлиши билан фаоллашадиган PvP ўйиндир. Буларнинг ҳаммасидан озроқ маблағ ишлаб олиш ҳам мумкин.
Озгина ватқ ажратиб, барчасини текшириб олиш.
Қароқчи кодекси
Кўз олдингизга дарров Жек Чумчуқ келдими? Шошилманг, бу ерда бошқа кино бўлади. Унда денгиз жанглари ҳам, портлардаги жандаллар ҳам, бочка-бочка ром ҳам йўқ. Ўйин воқеалари денгиздаги кимсасиз оролда бўлиб ўтади. Вазифангиз оролни ширакайф қароқчилар билан тўлдириш. Тавсиф бизнинг тасаввуримиздаги елкасига тўтиқуш қўндириб олган қароқчига умуман мос келмайди. Жанг бўлмагандан кейин қўшни оролда яшайдиган офатижон қиз – Қонхўр Мери маслаҳатга келади.
Шундай қилиб, сиз шахта ва тахта тиладиган машина ёрдамида олтин ва ёғоч олишингиз, шунингдек жаҳлдор ва кўзи қонга тўлган каллакесар қароқчиларни тўйдириш учун чексиз миқдорда ром топишингиз зарур бўлади. Кўрфазда яхшилаб ўрнашиб олганингиздан кейин бемалол мулкингизни кенгайтириш ҳақида ўйлашингиз ва қўшни оролларга юриш қилсангиз ҳам бўлаверади. Энг асосийси, ўз вақтида ромга буюртма беришни унутмаслик керак.
Бир финжон қаҳва ичулгунча кўриб чиқиш.
Rail Nation
Мазкур онлайн ўйин-стимулятор Гарвард университетидаги бизнес-курсларга ўхшаб сизнинг стратег ва ишбилармон сифатида очилмаган қирраларингизни кашф этмайди, аммо зерикиб ҳам қолмайсиз. Олдингизга улкан вазифа қўйилган – ўзингизнинг транспорт компаниянгизни виртуал темир йўл оламидаги энг яхши компанияга айлантириш ва рақиблардан ўзиб кетиш.
Ўйиннинг асосий жиҳати – вақтнинг чекланганлиги. Ўйинда 6 та асосий босқич бўлиб, уларнинг ҳар бири 2 ҳафта давом этади. Сиз янги локомотивингизга маҳлий бўлиб ўтирганингизда рақобатчиларингиз маҳсулотлар учун нархларни тартибга солишмоқда, логистика билан шуғулланишаяпти, янги станция учун шрифт танлаш жараёнида дизайнернинг “сиқиб сувини ичишмоқда”. Ҳаммаси худди ҳаётдагидек – қария Сркуж Макдакка ўхшаб пулни ёстиқни тагига босиб ётадиганлар ютқазади.
Тезда бориб, Баффет ниманинг ҳисобига пул топаётганини аниқлаш керак.
My Sunny Resort
Қайноқ қуёш тафти, юмшоққина тўшама, Кариб денгизи тўлқинлари шовқини ва албатта сиз эринчоқлик билан симираётган тетиклаштирувч коктейл… бу туш эмас, балки “Upjers”нинг “Менинг серқуёш курортим” номли браузер ўйини. Лекин ҳаётда бўлгани каби бу ўйинда ҳам ишламаган, тишламайди. Шу боис кун давомида пляжда думалаб ётиш учун бироз тер тўкишга тўғри келади. Қисқаси, сиз океан қирғоғидаги меҳмонхона деб аталувчи эскигина уйнинг соҳиби ва менежерисиз. Аммо сайёҳлар уни четлаб ўтишмоқда, хатто жаннатмакон юрт қушлари ҳам бу ердан учиб ўтишга уялишади.
Одатдаги схема бўйича ишлаш керак: мижозлар жалб этилади, орол ободонлаштирилади ҳамда ўзларининг сайёҳат-пулларини истар-истамас сарфлайдиган хорижлик инжиқ сайёҳлар учун янги-янги эрмаклар ўйлаб топамиз. Вақт ўтиши билан оролни спа-ресторлари, улкан меҳмонхоналари, аквапарклари бўлган жаннатмакон жойга айлантириш мумкин.
Қизиқаётган бўлсангиз, у қандай кўринишга эгалигини билиб қўя қолинг.
Спарта: империялар уруши
“300 спарталик” фильмида Жерард Батлер “Бу Спарта!!!” деб бақиради. “Plarium”даги йигитлар унинг жўш урган ғайратидан илҳом олиб, кўплаб ўқув адабиётларини ўқиб чиқишди ва “Спарта: империялар жанги” номли браузер ўйинини яратишди. Унга Йеспер Кюд томонидан Hitman ва Assasins Creed сериялари учун ишланган мусиқа жўровоз қилинган.
Ўйин бошида сизга қурилишини якунига етказиш, озиқ-овқат билан таъминлаш ва муҳофаза қилиш талаб этиладиган шаҳар берилади. Фермалар, темирчилик устахоналари ва тахта тилиш цехлари аҳоли, фуқаролар ва аскарлар ишлашлари, жанг қилишлари ва авлод қолдиришлари учун зарур бўлган дон, бронза ва ёғоч ишлаб чиқаришади. Бу вақтда эса сиз Пантеонлар учун жангларда биргаликда ҳаракат қилиш учун иттифоқлар тузасиз, албянсларга қўшиласиз. Жанговар руҳни компьютерли рақибларга жангларда ошириб бориш мумкин. шундан сўнг жангларда тобланган саркарда мирмидонликлар, фракияликлар ва спарталиклардан иборат кучли армиясини хатто Ксеркс устига бошлаб борса ҳам бўлади. Фақат 300 нафардан кўпроқ одам олишни унутманг. Дарвоқе, Леонид сизга устозлик қилади, шу боис ўзбошимчалик қилишга шошилманг. Шу билан бирга, бизда ушбу ўйиннинг тўлароқ тавсифи ҳам бор.
Сал чигал ёзиб олиш керак. 10 дақиқада келаман.
Travian: Kingdoms
Яратувчилар велосипед ихтиро қилиб ўтиришмаган, шу боис “Травиан”нинг бешинчи қисмида фақат графика ўзгарган ҳамда ўйинчиларга қулайлик яратадиган озроқ янгиликлар киритилган. Бу ерда ҳар доимгидек учта қабила бор: римликлар, германлар ва галлар. Шунингдек, натарлар – бутун ўйиннинг мақсади бўлган Олам Мўъжизасини яшириб қўйган жаҳлдор халқнинг шаҳри мавжуд. Сиз уни эгаллашингиз билан ўйин тугайди: олиқшлар, қарсаклар янграйди, мушакбозлик бошланади, сервер ўз ишини тўхтатади ва ғолибни эълон қилади.
Аммо бунгача ҳали кўп тер тўкиш керак: ўз қишлоғингизнинг қурилишини якунига етказишингиз, уни душманлардан ҳимоя қилишингиз, манбалар йиғишингиз, кўплаб жангларда қатнашишингиз зарур бўлади. Бу ўйиндаги энг муҳим ресур – бу вақт, чунки ўйин бошида бирор бир ҳаракатни амалга ошириш учун бир неча дақиқа кутиб туришни сўрашса, орадан бир ҳафта ўтиб соталаб кутишга тўғри келади. Кутолмайдиганлар учун битта йўл бор: озроқ харажат қилиб, жараённи тезлаштриб юбориш мумкин.
Ҳозир ёзиб олиб, кейин уйда ўйнайман.
Фаришталар лигаси
Аниме услубидаги мазкур онлайн ўйиннинг сюжети жуда ҳам оддий: Ёруғлик кучлари Зулмат кучлари билан доимий кураш олиб боришади. Жодугарлар, афсунгарлар ва бошқа ёвуз кучларнинг саъй-ҳаракати билан фаришталар отряди кучидан махрум этилиб, ерга сургун қилинган. Улар қора кучларни енгиб, яширин кучларини қайта қўлга киритишлари зарур. Ўйинчида турли ўлчам ва сиёсий қарашга эга 13 нафар фаришта ичидан танлаб олиш имконияти бор, уларнинг биттасини ўйинчини бошқаради, яна тўрттаси эса компьютер ёки бошқа ўйинчилар ёрдамида бошқарилади.
Жанглардан ташқари, квесталардан ўтиш, ҳудудларни тадқиқи қилиш, ер ости йўлларини тозалаш ва ўйиндан ташқаридаги қаҳрамонларни қутқариш керак. Яратувчилар вазифалар устида жиддий бош қотиришгани кўриниб турибди: воқеа батафсил сўзлаб берилади, эринчоқларга бу миссия уларга нега кераклиги тушунтирилади, ғалаба учун эса қаҳрамон муносиб тақдирланади. Шу билан ўйин ҳам тугайди.
Мен ишда ҳам аслида шулар билан бандманку.
Dragon Knight
Мазкур MMORPG браузер ўйини анчадан бери осиёлик фойдаланувчилар ўртасида маълум ва машҳур, лекин маҳаллий бозорга у фақат ўтган йили кириб келган. Ўйин сюжетига кўра, даҳшатли аждаҳо кўп йиллар аввал гўзал маликани ўғирлаб кетган, сиз ана шу маликани тутқунликдан озод этишингиз керак. Гарчи сиз аждаҳо бўлмасангиз ҳам негадир минг йилни ўтказиб юборгансиз (ўйинда бунинг сабаби тутунтирилмайди) ва сизнинг душанбангиз маликани қутқаришдан бошланади.
Бизнингча, яратувчилар “Қисқалик – иқтидордан нишона” деган принципга амал қилишган бўлишса керак. Шу боис қаҳрамон танлаш имконият ҳам кўп эмас: ёрқин файерболлар сочадиган афсунгар ва шамшир ҳамда муштларини моҳирона ишлатадиган жангчи бор холос. Мақсад аниқ: аждаҳони топиш, уни ўлдириб гўзал маликани қутқариш.
