Бу флагманни харид қилиш учун Европада йирик навбат юзага келмоқда
Хитойнинг OnePlus компанияси қисқа муддатда жаҳоннинг турли ҳудудларида яшайдиган мухлисларига эга бўлди. Шу боис, ўтган ҳафтада тақдим қилинган OnePlus 5 флагмани бугун Хитойдан аввал халқаро смартфон бозорига сотувга чиқарилиши кутилаётган эди. Бироқ, хитойлик ишлаб чиқарувчи флагманнинг илк партиясини ўз вақтида савдога тайёрлашга улгурмагани боис, бренднинг Амстердам, Нью-Йорк, Берлин, Копенгаген, Лондон ва Париждаги дўконлари олдида харидорларнинг йирик навбати юзага келган.
5.5 дюймли FHD (1080 × 1920 пикселли), Optic AMOLED технологиясида ишлайдиган экранга эга OnePlus 5’нинг энг илғор жиҳати — у 64 битли ва 8 ядроли, 2.45 Ггц частота тезлигида ишлайдиган, 1 кристалли илғор Snapdragon 835 процессори билан таъминланган ва бу чип айни пайтда жаҳоннинг энг илғор процессоридир. Шунингдек, қўш объективли бош камерага эга смартфон Apple’нинг iPhone 7 Plus флагманининг камера технологиясини ўзлаштирган.
Қолаверса, таниқли брендларнинг флагманларидан 2 баробар арзон OnePlus 5 айни пайтда кўпчиликда қизиқиш уйғотмоқда. OnePlus 5’нинг энг арзон талқинига $480, юқори талқинига $539 доллардан олдиндан буюртма бериш мумкин. Янги смартфон 27 июндан бозорга чиқарилади. Смартфон тақдим қилингунига қадар 300 мингдан зиёд киши уни харид қилиш учун рўйхатдан ўтган.
Таққослаш учун айтамиз, iPhone 7 Plus жаҳон бозорида сезиларли даражада қиммат — $769 (32 ГБ) ва $869 (128 ГБ) доллар. Яъни, хитойлик янги смартфон iPhone 7 Plus каби: дизайн, камера имкониятлари, сифатли дисплей. Гўёки Andoid Nougat’да ишлайдиган айфон. Шу билан бирга, анча арзон.
OnePlus электрон почта орқали гаджетни аввалдан буюртма қилганлардан узр сўраган ва уларга маънавий зарар учун 5 еврога тенг бўлган купон тақдим қилган.