Chrome’нинг Android талқинида 300 мингдан зиёд VR-контент кўриш мумкин
Google 2016 йилнинг май ойида мобиль қурилмалар учун Daydream номли юқори сифатли виртуаль воқелик аппарат-таъминот воситасини эълон қилган эди. Сентябрь ойида эса, Daydream платформаси дастурчилар учун очиқ деб эълон қилинди. 2016 йилнинг ноябрь ойидан бошлаб Google Daydream View виртуаль воқелик шлеми, яъни гарнитураси $80 доллардан сотувга чиқарилган эди.
Google компанияси томонидан яқинда эълон қилинган Chrome браузерининг Android операцион тизимига мўлжалланган навбатдаги “Chrome 56” барқарор талқинидаги муҳим жиҳатлардан бири ҳам унинг юқоридаги WebVR стандартини қўллаб-қувватлаши экани айтилмоқда. Мазкур дастурий интерфейс JavaScript базасида яратилган бўлиб, мобиль қурилманинг виртуаль воқелик шлеми билан мослашишини таъминлайди. Яъни, WebVR браузерининг ёрдамисиз Daydream платформасидаги онлайн контентни виртуал гарнитурада кўришнинг имкони йўқ.
Chrome’нинг Android тизимига мўлжалланган бу дастурдан ҳозирча Google Daydream ҳамда Daydream View гарнитураларида фойдаланиш мумкин.
Chrome маҳсулотлари бўйича менежер Меган Линдсей ўзининг шахсий блогида ёзишича, айни пайтда Daydream платформасида фойдаланувчилар смартфонлари ва виртуаль гарнитура орқали кўришлари мумкин бўлган онлайн контент миқдори 300 мингдан ошиқ ва бу рақам кун сайин ошиб бормоқда. Айтиш керакки, мазкур платформани ҳозирча 3 та смартфон, яъни Google Pixel, ZTE Axon 7 ва Motorola Moto Z қўллаб-қувватлайди. Истиқболда эса Huawei Mate 9 Pro ва ASUS ZenFone AR смартфонлари фойдаланувчилари бу ердаги онлайн контентни кўриш ва 360 градусли виртуал саёҳатни амалга оширишлари мумкин бўлади. Google амалга ошираётган Cardboard лойиҳаси яқин йилларда WebVR дастуридан бошқа гаджетлар эгаларининг ҳам фойдаланишларини таъминлайди.
