Доналд Трампнинг смартфонида биттагина илова бор
2016 йилда ўтказилган сайловлар чоғида ҳамда президентликнинг илк кунларида АҚШ раҳбари Доналд Трамп Android смартфонидан твитлар ёзиб турган. The New York Times нашрининг ёзишича, АҚШ президенти ўшанда Galaxy S3 смартфонидан фойдаланган. Бу смартфондаги хавфсизлик тизими 2015 йилдан буён янгиланмаган бўлган.
Аммо, Оқ уй хавфсизлик хизмати талабларига кўра, жорий йилнинг баҳоридан Доналд Трамп қадрдон Android қурилмаси билан хайрлашиб, Apple iPhone тута бошлайди. АҚШ ҳукумати расмийларига кўра, iPhone ҳар қандай Android қурилмасига қараганда хавфсизроқ.
АҚШ президенти Доналд Трампнинг iPhone русумли смартфонида биргина илова бор, яъни Twitter. АҚШ етакчиси смартфоннинг туб функцияларидан ташқари, бошқа амалларни бажариш ва иловалардан фойдаланишдан маҳрум қилинган. Бу тўғрида Америкада машҳур бўлган Axios онлайн ахборот ва маълумотлар нашри маълум қилган. Унга кўра, Трампнинг ёрдамчилари уни имкон қадар смартфон экранидан узоғроқ тутиб, таҳрир қилинмаган твитлар юборишдан чалғитиб туришади.
Шундай бўлса ҳам, бугун — 30 май куни соат 15:09 да жаноб Трамп Twitter’даги саҳифасида ‘Covfefe’ деган сирли сўзни ёзиб, қовун тушириб қўйгани жамоатчиликнинг кулгисига сабаб бўлди. Маълум бўлишича, АҚШ президенти “coverage” сўзини адашиб шу тарзда ёзиб, нашр қилган.
