eeYss хизмати орқали вақтингизни назорат қилинг

eeYss хизмати орқали вақтингизни назорат қилинг

Вақт — энг қиммат, айни вақтда кўпчилик учун беқадр бойлик. Йўқотилган лаҳзаларни ортга қайтаришнинг имкони йўқ. Шу боис ҳар бир дақиқанинг қадрига етишимиз, улардан унумли фойдаланишимиз керак. Аммо қандай қилиб? Сизга тавсия қилаётган онлайн хизмат аввало вақтингизни нималарга сарф этаётганингизни билишингизга ёрдам беради. Кун давомида овқатланиш, иш ва кўнгилочар машғулотлар, спорт ҳамда бошқа юмушларга қанча вақт сарфлашингизни билиб олсангиз, қимматбаҳо бойлигингизнинг қайси қисмини бефойда сарфлаб юбораётганингизни аниқ тушуниб етасиз, кейинги хулоса, мақсад ва режалар эса ўз-ўзидан пайдо бўлаверади.

Шундай қилиб, eeYss хизмати орқали кун давомида қайси юмушларга қанча вақт ажратаётганингизни қайд этиб боринг, шунда ҳафталик, ойлик ва йиллик маълумотлар яққол кўзга ташланиб қолади.

Хизмат еттита асосий фаолиятга асосланган:

  • иш;
  • оила;
  • саломатлик учун қайғуриш;
  • таълим;
  • маданий ривожланиш;
  • кўнгилхушлик;
  • мутолаа.

Хизматдан рўйхатдан ўтганингиздан сўнг ҳар куни уларга қанча вақт сарфлаганингизни беш баллик шкала бўйича қайд этиб борасиз. Бу бир дақиқалик вақтингизни олади холос. Бироқ ана шу бир дақиқа кейинчалик жиддий статистикани тақдим этади. Орадан бир ҳафта ўтибоқ ҳаётингизнинг қайси жабҳалари эътиборингиздан четда қолиб, диққат қаратишингиз лозимлигини кўрсатади.

Хизмат ҳар ҳафталик, ойлик ва йиллик фаолиятингизни баҳолайди. Маълумотларни эса жадвал ва диаграмма кўринишида олишингиз мумкин.

Юқоридаги етти бўлинманинг истаганини танлаш имкони мавжуд. Масалан, биргина саломатлик ёки мутолаани танлаб, ҳафта, ой ва йил давомида ушбу фаолият учун қанча вақт сарфлаганингизни билиб боришингиз ҳам мумкин.

eeYss хизматидан қанча кўп фойдалансангиз, таҳлил учун шунча кўп ишончлик маълумотларга эга бўласиз. Вақт ўтиши билан сиз ўзингизни аввалги ҳолатингиз билан солиштиришингиз ва ривожланиш жараёнини кузатиб боришингиз мумкин бўлади.

Яна бир бонус. Бир дақиқалик режалаштириш ва кунингизни баҳолаб бориш, бу — фойдали одат бўлиб, ажойиб истиқболлар сари йўл бошлайди.

Ушбу хизматга қуйидаги ҳавола орқали киришингиз мумкин.

Манба: Erkak.uz

Terabayt.uz сайтининг видеолари: Youtube'даги каналимизда!