Экранининг ўзи бармоқ изи сканерига айлантирилган илк смартфон маълум бўлди ва у Samsung маҳсулоти эмас...
Яқиндагина Американинг Synaptics компанияси дисплейнинг ўзига ўрнатилган дактилоскопик сканерни оммавий ишлаб чиқара бошлаганини маълум қилган эди. Synaptics мазкур технология жорий қилинган ва истеъмолчилар бозори учун оммавий тақдим этиладиган биринчи смартфон 9–12 январь кунлари Лас-Вегас шаҳрида бўлиб ўтадиган CES 2018 кўргазмасида намойиш этилишини ҳам айтган. Бироқ қайси смартфонсоз ўзининг янги қурилмасига бу технологияни татбиқ этиши масаласи очиқ қолган.
ЎҚИНГ: Бармоқ изи сканери экраннинг ўзига жойланган илк смартфон тақдимотига атиги бир ой қолди!
Бутун дунё бўйлаб кўпчилик фойдаланувчилар мазкур ушбу инқилобий смартфон Samsung маҳсулоти бўлишини тахмин қилишган эди. Аммо, Phone Arena нашрининг хабар беришича, жанубий кореялик техногигант ишқибозларининг ҳафсаласи пир бўладиган бўлди. Чунки дисплейдаги дактилоскопик сканер технологияси татбиқ этилган илк смартфон Хитойнинг Vivo компаниясига тегишли экан.
Хабарга кўра, мазкур маълумотни Forbes ходими Патрик Морхед тарқатган. Унинг ўзи смартфонсознинг ишлаб чиқариш тизимига ташриф буюрган ва тайёр смартфонни ўзи ишлатиб кўрган. Айтишича, CMOS-сенсор экрандаги одатий битта нуқтада эмас, балки дисплейнинг бутун юзасида амал қилади. Морхед унинг ишлашини синаб кўрган ва кўнгли тўлган – сканер у ўйлаганидан кўра тезроқ ишлар экан.
ЎҚИНГ: Apple ва Samsung уддалай олмаган технологияни Vivo амалга оширди
Synaptics компанияси ишлаб чиққан ушбу сенсор – Clear ID FS9500 русумли датчик дисплей остига ўрнатилади. Унинг ишлаши учун ёруғлик талаб этилади – сенсор бармоқ изининг аксини таниб олади. Мазкур датчик томонларининг ўзаро нисбати 18:9 ҳамда 20:9 бўлган экранларга мос келади.
Vivo смартфонининг Clear ID FS9500 орқали блокдан чиқишига 0,7 вақт сарфланади. Бу одатий дактилоскопик сканерларнинг бармоқ изини таниш муддатидан 0,2 сонияга кеч. Аммо фойдаланувчини у юзни таниш технологиясидан кўра 1,4 сонияга тезроқ аниқлайди.
