Эксперт: “Ҳар кимдан ҳам смартфон сотиб олманг!”
Android смартфон фойдаланувчиларининг энг катта ташвиши, бу — вирус, шундай эмасми? Ҳа, бу операцион тизими вирус ҳужумига кўпинча ожиз қолади. Аммо, бугун баъзи смартфонлар қадоқни ичидаёқ вирус билан харидорга етиб бормоқда. Ҳали бирор сайтга кирмасингиздан смартфонда вирус мавжуд бўлади.
Экспертлар яп-янги смартфонларда 38 турдаги Android қурилмаларга мўлжалланган зарарли вирусларни аниқлашди. Бу дастурлар орқали ҳаккерлар фойдаланувчининг ҳар қадамини кузатишга эришадилар. Samsung, LG, Xiaomi, Asus, Nexus, Oppo ҳамда Lenovo брендларининг турли моделлари ана шундай вируслар ўрнатилган ҳолда сотувга чиқарилмоқда.
Мутахассисларнинг маълум қилишларича, бу ўрнатилган вируслар фойдаланувчининг махфий сўзлари, банк ҳисоб рақамлари ва уларнинг электрон калитларини ўғирлаш, смартфонга хоҳлаган дастурни ўрнатиш имконини беради. Шу билан бирга, бу каби вируслар манзилни аниқлаши, камера орқали кузатиш, бошқа рақамларга сохта хатларни юбориш имконини беради.
Экспертларнинг тасдиқлашларича, бу вируслар 2-қўл, яъни онлайн дўконлар ёки харидор кўринишидаги ҳаккерлар томонидан ўрнатилмоқда. Ҳозирча бундай вируслар ўрнатилган Galaxy Note 2, 3, 4 ва 5, Galaxy S7, LG G4, Xiaomi Mi 4i каби смартфон моделлари аниқланган. Шу туфайли ҳам, экспертлар смартфонни фақат дўкондан, ишончли савдо мажмуасидан харид қилиш кераклигини таъкидлашмоқда.
