Флешкадан фойдаланиш қоидалари

Флешкадан фойдаланиш қоидалари

Компьютер технологиялари ривожланиб, ҳаётимизга турли янги қурилмалар кириб келди. Шулардан бири флеш кард ёки қисқароқ айтганда флешка. Мазкур қурилма ҳам худди соат ёки телефон каби барча учун бирдек зарурий буюмга айланиб улгурди.

Флеш кардларнинг дастлабки намунаси 1984 йилда Фудзи Масуока томонидан яратилган. Флешкадан маълумотни ўчириш жараёни фоточақноққа ўхшагани сабаб, муаллиф ўз ихтиросини “флеш” деб номлайди.

Замонавий флешкалар эса 2000 йилда пайдо булган. Дастлаб улар 8 мегабайт хотирага эга эди. Ва бу ўша давр учун катта ихтиро ҳисобланган. Тасаввур килинг, 8 МБ—бу 4000 бетга яқин матн ёхуд бир дақиқадан камроқ видео тасвир дегани. Бугунги кунда биз учун оддий саналган стандарт флешка эса 6 Гб хотирага эга. У 36 соатлик видео тасвирни ёки бутун бир виртуал кутубхонани ўз ичига олиши мумкин.

Замонавий технологиялар ҳамиша ривожланишда. Кундан-кунга янги кўринишдаги катта ҳажмли хотирага эга флешкалар яратиляпти. Ишлаб чиқарувчларнинг сўзларига кўра, замонавий флешкага 100 000 мартагача маълумот ёзиш мумкин экан. Рақамларга эътибор қаратсак, кунига ўртача 10 маротаба ишлатилган флешка сизга оз эмас, кўп эмас 27 йил хизмат килиши мумкин. Бу, албатта, ундан қандай фойдаланишингизга боғлиқ. Қандай дейсизми? Диққат билан ўқинг:

Флешкангиз сизга узоқ хизмат қилишини истасангиз, ушбу оддий қоидаларга амал қилинг: биринчидан, флешкани эҳтиёткорлик билан ишлатиш зарур: кутилмаган зарбалар, намлик ёхуд кучли электромагнит майдонларидан узоқда сақланг.Флешкани компьютер ёқилишидан олдин ёки оперцион тизим ишга туширилгандан кейин ишлатинг. Акс ҳолда операцион тизим флешкани аниқлай олмаслиги мумкин.

Флешкада турли амалларни бажариш тавсия этилмайди. Маълумотларни аввал қаттиқ дискка ёзиб, таҳрир килиб, сўнгра флешкага кўчириш лозим. Ёки аксинча, флешкадаги маълумотларни ўзгартиришга эҳтиёж сезилса, аввал уни қаттиқ дискка кўчириб, сўнг ишлаш лозим. Унутманг, флешка маълумотларни ташиш ҳамда вақтинчалик сақлашга мўлжалланган. Флешкангизни вируслардан тозалашни канда қилманг.

Барча амалларни якунлагандан сўнг, “қурилманинг хавфсизлигини таъминлаш” функциясидан фойдаланинг. Бунинг учун сичқончанинг чап тугмасини босиб, контекст менюдан «USB қурилмани хавфсиз чиқариш»ни танлайсиз. Агар USB қурилмани чиқаришда муаммо юзага келса, “амални ҳозирда бажарашнинг иложи йўқ» деган ёзув чиқса, демак, баъзи файллар очиқ қолган. Уларни ёпиб, амалларни қайта бажаринг. Доим ушбу қоидаларга риоя қилсангиз, жажжи дўстингиз флешка сизга узоқ ва ҳеч бир муаммосиз хизмат қилиши аниқ.

Қизиқарли маълумот: флешкани узоқ хизмат қилиши учун уни музлаткичда сақлаш керак экан! Чунки юқори ҳарорат флешкага салбий таъсир этади, паст ҳарорат эса аксинча.