“Galagram” иловасига патент берилди

Ўзбек дастурчилари Бекзод Бўронов ва Шоҳрух Шарипов “Galagram” деб номланган мобиль ва компьютер иловасини ишлаб чиқди. “Galagram”—бу Android, BlackBerry OS, iQ_S, Svmbian, Windows Phone, Bada сингари платформаларда ва компьютерларда Windows, OS_X ва Linux бошқарувида ишлайдиган смартфонлар учун мўлжалланган интернет-телефон. Бепул кроссплатформали мессенжер.

У орқали  матнли материаллар, расмлар, овозли смайлчалар, фото, видео ва аудиохабарлар юбориш, беш ёки ундан ортиқ кишилар учун видеоконференциялар ташкил қилиш, шунингдек, онлайн ўйинлар ташкил қилиш, халқаро кириш ва чиқиш қўнғироқларини амалга ошириш мумкин.

Хизмат халқаро бозорга мўлжалланган бўлиб, мультитил (инглиз, рус, ўзбек, хитой ва б.) интерфейсга эга. Фойдаланувчилар аккаунти телефон рақамларига уланади. Сервисда рўйхатга олиш ва кейинчалик янги қурилмаларни авторизация қилишда кодли СМС-хабар юбориш орқали телефон рақами текширилади. Олинган код мазкур аккаунт учун янги мижоз иловасини авторизация қилади.

Муаллифлар Бекзод Бўронов ва Шоҳрух Шариповга дастур учун патент берилди, деб ёзади Ўзбекистон интеллектуал мулк агентлиги расмий сайти.