Galaxy A туркуми смартфонлари яна бир флагманча хусусиятга эга бўлади
Samsung компанияси ўз смартфонларини уч хил туркумда чиқаришидан хабарингиз бор. Булардан Galaxy S серияси юксак хусусиятларга эга флагманлар бўлса, Galaxy A туркуми – ўрта нархли, Galaxy J эса – ҳамёнбоп телефонлардир.
ЎҚИНГ: Илғор Galaxy A6 модели сотувга тайёр!
Лекин кейинги пайтларда жанубий кореялик техногигант ўзининг Galaxy A сериясидаги қурилмаларига ҳам флагман хусусиятларини жорий этаётганига гувоҳ бўлаётирмиз. Айрим манбаларга кўра, Samsung энди ушбу туркумдаги смартфонларига яна бир флагманча жиҳатни татбиқ этмоқда.
Аниқроқ айтадиган бўлсак, Samsung айни кунларда диагонали 5,78 дюймни ташкил этувчи, бурчаклари қайрилма AMOLED дисплей устида ишламоқда. Жанубий Корея оммавий ахборот воситалари тарқатаётган маълумотларга қараганда, бу экранлар Galaxy A7 2019 ҳамда Galaxy A8 2019 смартфонларига қўйилади. Гарчи номи кейинги йилга ишора қилаётган эса-да, Samsung ушбу икки моделни жорий йилнинг сўнгидаёқ намойиш этишини айтишмоқда.
Табиийки, кучайтирилган хусусиятлари билан бирга бу смартфонларнинг нархлари ҳам кўтарилса керак. Ҳозиргача бозорга тақдим этилган Galaxy смартфонларининг аксариятини эса юртимизда ҳам харид қилиш имкони мавжуд.
