Galaxy S10 – сканерли дисплейга эга 5G-смартфон процессори ҳақида маълумотлар чиқди

  •   DiMaX
  •  4035
  •  09.04.2018 12:09

Galaxy S10 – сканерли дисплейга эга 5G-смартфон процессори ҳақида маълумотлар чиқди

Samsung компанияси бу йилги Galaxy S9 ҳамда S9+ билан кўнгилдагидек натижаларга эриша олмаганидан хабарингиз бор. Шунинг учун компания ўзининг навбатдаги фаблети – Galaxy Note 9 билан дунёни ҳайрон қолдиришга бел боғлаган.

ЎҚИНГ: Қойилмақом Galaxy Note 9’ни видеода кўрамиз!

Шунингдек, олдинда ҳали кейинги йил намойиш этиладиган Samsung Galaxy S10 модели ҳам борки, унинг процессори тақдим этиладиган вақт куни кеча маълум бўлди.

SamMobile нашрининг аниқлашича, Samsung аллақачон ўзининг Galaxy S10 туркумидаги смартфонлари учун Exynos 9820 процессорини тайёрламоқда. Манбанинг маълумотларига кўра, ушбу чип кейинги йилнинг январь ойида Лас-Вегас шаҳрида бўлиб ўтадиган CES 2019 кўргазмасида намойиш этилади.

ЎҚИНГ: Samsung Galaxy S10 қандай бўлади?

Жанубий кореялик техногигантнинг Galaxy S10 флагмани учун «электрон юрак» бўладиган Exynos 9820 процессори уяли алоқанинг бешинчи авлод – 5G тармоғида ҳам ишлай олиши айтилаётир. Мазкур чип 10 нанометрлик технологик жараён асосида тайёрланади, шу боис Samsung Galaxy S10 флагманининг самарадорлиги Galaxy S9 моделига нисбатан тахминан 15–20 фоизга юқори бўлиши тахмин қилинмоқда.

Exynos 9820 процессорининг тақдимотидан бир ярим ой ўтиб, Барселонадаги MWC 2019 кўргазмасида компания бу чип базасидаги флагман – Galaxy S10 моделини намойиш этади. Таҳлилчилар ушбу смартфон нафақат «юбилей» номига, балки бошқа сабабларга кўра ҳам Samsung тарихида туб бурилиш бўлишини айтишаётир. Чунки, агарда компания шу модели билан ҳам харидорларни ҳайратга сола олмаса, илғор даражали мобил қурилмалар бозоридаги етакчилигини қўлдан бой бериши мумкин. Зеро, Huawei, Xiaomi каби бошқа ишлаб чиқарувчилар ҳам аллақачон жанубий кореялик гигантнинг флагманларидан қолишмайдиган моделлар тақдим эта бошлаган. Шунга кўра, кузатувчиларнинг прогнозларича, Samsung Galaxy S10 моделида дисплейнинг ўзига интеграциялашган бармоқ изи сканери, такомиллашган юзни таниш тизими ва бошқа илғор технологиялар татбиқ этилиши кутилаётир.

ЎҚИНГ: Galaxy S10 қиёфани худди iPhone X каби танийди

Terabayt.uz сайтининг видеолари: Youtube'даги каналимизда!