Galaxy S6 – Samsung тарихидаги энг яхши телефон

Galaxy S6 – Samsung тарихидаги энг яхши телефон

Samsung смартфонларининг доимий муаммоси учта эди: дизайн ва арзон материал – пластикдан қилинганлиги; унчалик ҳам мустаҳкам эмаслиги ҳамда иловаларнинг секин ишлаши. Шунга қарамасдан, Samsung Galaxy S серияси жаҳон бозорида жуда катта муваффақият билан сотилди.

Лекин, сўнгги йилда ҳаммаси ўзгарди. Энди LG, Sony каби доимий рақобатчилардан ташқари Lenovo, Huawei, Xiaomi ва хитойлик бошқа яна бир қанча компаниялар Samsungга жиддий рақобат туғдира бошлади. Samsung эса, қатъий ўзгаришларга қўл уришни кечга суриб келди. Этибор берган бўлсангиз, Samsung Galaxy S3 телефонидан бошлаб Galaxy S сериясига кескин ўзгаришлар қилинмаганди. Шунчаки кейинги смартфон олдингисининг заиф томонларини тўлдирар, яхшилар, лекин кескин ўзгаришлар киритилмасди. Натижада Samsung бозордаги улушини йўқота бошлади.

Шу сабабли бу гал Samsung бошқа йўлдан боришга мажбур бўлди ва кескин ўзгаришлар киритишга қарор қилди. Samsung Galaxy S6да ҳамма нарса, кичик деталигача қайта кўрилди, қайтадан ишлаб чиқилди ва Samsung Galaxy S6 одатий Galaxy S сериясидаги телефонлардан мутлақо бошқача бўлди.

Умумий характеристикаси: 

Мобил аппарат тури: смартфон
Операцион тизими: Андроид 5.0
Смартфон корпуси: классик
Корпусда ишлатилган материаллар: алюминий ва шиша
СИМ-карта: нано СИМ
СИМ-карталар сони: 1
Оғирлиги: 138 гр
Ўлчамлар: 70,5х143, 4х6,8 мм
Экран тури: рангли Супер АМОЛЕД, 16.78 млн турдаги ранглар, сенсорли
Диагонал: 5,1 дюйм.
Ҳар дюймда пикселлар сони (ППИ): 576
Қирилишга қарши ҳимоя: бор
Фотокамера: 16 мегапиксел, рангли диодли чақнагич
Олд камера: бор, 5 мегапиксел.
Аудио: MP3, AAC, WAV, WMA
Стандарт алоқа: GSM 900/1800/1900, 3G, LTE
Интернет: WAP, GPRS, EDGE, HSDPA, HSUPA, HSPA+
Интерфейс: Wi-Fi 802.11ac, Wi-Fi Direct, Bluetooth 4.1, IRDA, USB, ANT+, NFC
Йўлдошли навигация: GPS/GLONASS
Процессор: Samsung Exynos 7420
Процессор ядролари сони: 8
Видеопроцессор: Mali-T760 MP8
Ички хотира сиғими: 32 Гб
Тезкор хотира: 3 Гб
Ташқи хотира картаси слоти: йўқ
Аккумуляторнинг ҳажми: 2550 мА/с
Аккумулятор: ечиш имконияти мавжуд эмас
Симсиз зарядлаш функсияси: бор

Дизайн

Samsung бозордаги ўз мавқеини тиклаши учун ўзининг энг оғриқли нуқтаси – дизайнини буткул қайта кўриб чиқиши керак эди. Тан олиш керак, бу борада ҳақиқатан ҳам кескин ўзгариш қилинди – Samsung ниҳоят ўз смартфонининг чиройи билан одамни лол қолдира олди. Смартфонни илк маротаба қўлга олгандаёқ, унинг ўта сифатли, гўзал ва мустаҳкам материалдан тайёрланганлигини ҳис қилдим. Смартфон жуда ингичка, бурчаклари енгил букилган, уни қўлда ушлаб туришнинг ўзи бир завқ.

Galaxy_S6_dizayn

Дизайндаги ягона ноқулайлик – бу орқа камеранинг корпусдан бироз чиқиб турганлиги: смартфон юзи тепага қилиб қўйилганда, биринчидан камера ерга тегиб қолади, иккинчидан смартфон бир текис турмайди.

Смартфоннинг ён томони алюминийли гардиш билан ўралган, бу бизга олмали смартфоннинг олтинчисини эслатиб юборади. Нима бўлганда ҳам, металл гардиш қурилмага мустаҳкамлик бағишлайди ва ташқи таъсирлардан ҳимоя қилиб туради. Смартфоннинг олд ва орқа томони ўта сифатли Gorilla Glass 4 ойнаси билан қопланган. У ҳам ушлашга ёқимли, ҳам смартфонни башанг қилиб кўрсатади. Gorilla Glass’нинг нуқсони – унда бармоқ излари яққол кўриниб қолади.

Экран

Агар сиз бугунга қадар «Ретина» иборасини эшитмаган бўлсангиз, сизга тушунтириб ўтамиз.

«Ретина» тушунчаси илк маротаба Apple томонидан қўлланилган бўлиб, инсон кўзи илғамайдиган даражада юқори пикселлар зичлигига эга экранни англатади. Сиз бугунги кунда кўриб турадиган экрандаги тасвир кичик нуқталар, яни пикселлар воситасида яратилади.

Экрандаги тасвир бир неча миллионта рангли нуқталарнинг жамланишидан пайдо бўлади. Экранда нуқталар қанчалик кўп бўлса, тасвир сифати шунчалик яхши бўлади. Экраннинг ўлчами ва ундаги пикселлар сонига қараб, тасвир сифатини аниқлаш мумкин. Экрандаги ҳар дюймда нечта нуқта – пиксел борлиги экраннинг резолюцияси (ёрқинлиги)ни кўрсатади.

Galaxy_S6_ekran

Смартфонларни ўртача кўзимиздан эллик сантиметр нарида тутиб турамиз. Бундай масофада смартфоннинг резолюцияси телевизор ёки компьютерникидан кўра яхшироқ бўлиши керак, акс холда пикселлар кўзга ташланиб қолади, тасвир ёқимсиз ҳолга келади – квадратчалар сезилиб қолади. Бундай бўлмаслиги учун, ҳар дюймда пикселлар сони (ppi) камида 300та бўлиши керак.

Смартфонлардаги экран резолюцияси:

Samsung Galaxy S6: 5, 1 дюймли экран, 576 ppi;
Samsung Galaxy S5: 5, 1 дюймли экран, 432 ppi;
iPhone 6 Plus: 5, 5 дюймли экран, 401 ppi;
iPhone 6: 4, 7 дюймли экран, 326 ppi.

Экрандаги тасвирнинг сифатли чиқиши экрандаги пикселлар нисбати ёки экраннинг пикселларни кўрсатиш қобилиятига боғлиқ, уни экран сиғими деб ҳам атаймиз. Кўрсатиш қобилияти деганда, экраннинг горизонтал ва вертикал йўналишда сиғдира оладиган пикселлар сони ҳисобга олинади. Пикселлар сони қанчалик кўп бўлса, тасвир шунчалик тиниқ бўлади. Масалан, экранингиз узунасига, яни горизонталига 1920 та пиксел сиғдириб, тепадан-пастга, яни вертикалига 1080та пиксел сиғдира олса, жуда сифатли тасвирга эга бўласиз ва бу тасвир қобилияти «Full HD» деб номланади.

Смартфонлар экрани сиғими (кўрсатиш қобилияти):

Samsung Galaxy S6: 2560х1440 пиксел;
Samsung Galaxy S5: 1920х1080 пиксел;
iPhone 6 Plus: 1920х1080 пиксел;
iPhone 6: 1334х750 пиксел.

5,1 дюймли ўлчами, 2560х1440 пикселли кўрсатиш қобилияти (2,5К Quad HD) ва 576 ppi резолюцияси билан Samsung Galaxy S6 дисплейи Аpple’нинг Ретина экранларидан бутунлай устун туради. Samsung Galaxy S6 экранининг сифати LG G3, Oppo Find 7, Galaxy Note 4 каби смартфонларнинг экранлари билан рақобатга киришади. Бунинг ҳаммаси назарий томондан қиёслаш эди. Лекин амалда Full HD ва Quad HD ўртасидаги фарқни оддий кўз билан англаб етиш жуда қийин ва бу кўпроқ «енг зўр экран» деб мақтаниш, яъни маркетинг учун қилинган ҳаракатга ўхшаб қолиши мумкин.

Ёмон томони – одатда юқори кўрсатиш қобилиятига эга бўлган экран кўпроқ энергия талаб қилади ва аккумуляторнинг қуввати тез сарфланишига сабаб бўлади.

Биз амалда телефоннинг экранини синаб кўрдик. Қанчалик диққат билан қарасак-да, 1920х1080 пиксел, яни Full HD форматга эга LG G2 телефони экрани билан Samsung Galaxy S6 экрани ўртасида катта фарқ топа олмадик. Турли хил видео ўйинларни синаб кўрганимизда, улар 2560х1440 пикселда эмас, тасвирни 1920х1080 пикселда намойиш этишди. Бу, албатта, ушбу видео ўйинларни ишлаб чиқарадиган дастурчиларнинг танловидир, улар ҳозирча 2560х1440 пикселда тасвир бера олишмайди.

Кундузи қуёш остида ва ёқори ёруғликда экраннинг ёруғлигини синаб кўрдик. Қуёшли кунда экраннинг ёруғлиги 780 кд/м2 га етди ва бу бугунги смартфонлар орасида рекорд десак адашмаган бўламиз. Масалан iPhone 6 юқори ёруғлик остида 600 кд/м2 натижа кўрсатганди.

Хулоса қилиб шуни айтиш мумкин: Samsung Galaxy S6 бугунги кундаги смартфонлар орасида энг сифатли экранга эга. Кундалик ишлатувда экрандаги тасвир сифати жуда яхши, экран тиниқ ва сиз бирор ноқулайлик ҳис қилмайсиз.

Процессор

Шу вақтгача Samsung ўз смартфонларида икки хил – ўзининг Exynos процессори ва Qualcomm ширкатининг Snapdragon процессорларини ишлатарди. Одатда Snapdragon процессорларининг кучи Exynos процессорларидан анча яхши эди. Лекин, Samsung Galaxy S6 ва Galaxy S6 Edge’га келганда, Snapdragon’дан воз кечилди. Кўпчилик Samsung ўз смартфонлдарини Qualcomm’нинг энг сўнгги Snapdragon 810 процессори билан жиҳозлашини кутганди. Лекин Samsung ўз маҳсулотини афзал ҳисоблади, биз эса унинг танловини синаб кўрдик.

Шуни айтиш керакки, дунёда фақат Huawei ва Samsung’гина ўзи процессор ишлаб чиқариш имконига эга ва бошқа ширкатларга қарам бўлиб қолмаган. Қолган компаниялар, ҳатто Стив Жобснинг етим қолган ширкати ҳам ўз смартфонларига бошқа ширкатлардан процессор сотиб олади.

Galaxy_S6_processor

Тестга қайтайлик. Биз S6 процессорини Galaxy Note 4 ва Samsung Galaxy S5 4G+ билан, шунингдек LG G3 билан солиштирдик.

Galaxy Note 4 ва Galaxy S5’га Snapdragon 805, LG G3га эса Snapdragon 801 процессори ўрнатилган. Antutu benchmark дастурида Samsung Galaxy S6 ҳайратланарли 64 773 баллни тўплади. Samsung Galaxy Note – 46 100, Samsung Galaxy S5 – 48 900, LG G3 – 37500 балл тўплаганини ҳисобга олсак, Samsung Galaxy S6 бугунги куннинг нафақат энг кучли процессорларидан бирига, балки энг кучлисига эга.

Бенчмарк натижалари:

PC Mark: 

Samsung Galaxy S6 – 5000;
Samsung Galaxy Note 4 – 4091;
Samsung Galaxy S5 4G+ – 3611;
LG G3 – 3561.

3DMark Ice Storm Unlimited:

Samsung Galaxy S6 – 24840;
Samsung Galaxy Note 4 – 14603;
Samsung Galaxy S5 4G+ – 21100;
LG G3 – 15210.

Дастур-иловалар

Барча телефонларига Samsung ўзининг TouchWiz номли иловасини жойлайди ва уни бир неча функсиялар билан бойитади. Лекин, ушбу илова жуда оғир бўлиб, натижада телефон жуда секин ишлайди ва баъзида осилиб ҳам қолади.

Бу сафар Samsung TouchWiz иловасини ҳам бутунлай қайтадан кўриб чиққан ва қатор ўзгаришлар киритган. Смартфонда Андроид операцион тизимининг энг сўнгги – Андроид 5 Лоллитоп талқини ишлаб турибди. Ушбу талқин дизайни ва ишлаш тезлиги жиҳатидан олдингиларидан анча тез ва қулай.

Samsungнинг янги TouchWiz иловасидан кераксиз минг битта функсия олиб ташланган, уларнинг ўрнини ажойиб дастурлар тўлдирган ва бу смартфоннинг ишлаш тезлигига ижобий таъсир қилган. Қисқа қилиб айтганда – ҳаммаси анча соддалаштирилган.

Бизни ҳайрон қолдирган нарсалардан бири бармоқ изини танувчи мослама бўлди. Энди ушбу мослама iPhone каби Home тугмасида жойлашган ва ўзининг ишлаш тезлиги, аниқлиги жиҳатидан iPhoneдаги мосламадан анча яхшидир.

Бармоқ изларини танишда адашмаслигини текшириш учун iPhone 6 Plus ва Samsung Galaxy S6да 50 мартадан тест қилиб кўрдик. Турли хил ҳолатларда, бармоқни турлича қўйиб кўрдик. iPhone 88 фоиз ҳолатда, Galaxy S6 94 фоиз ҳолатда бармоқ изларини тўғри таниди.

Яна бир ютуқ – бармоқ изини аниқлаш тезлигидир. Бу борада iPhone 6 Plus Samsungдан анча ортда қолди.

Камера

Samsung Galaxy S6 16 мегапикселли камера билан жиҳозланган бўлиб, унинг энг катта афзаллиги оптик стабилизатор мавжудлигидир. Камера Sony компаниясининг энг сўнгги ютуғи – Sony IMX240 камерасидир.

Оптик стабилизатор, автофокус сифатли ва тезкор суратга олиш имконини беради. Фотосуратнинг ҳам, видеонинг ҳам сифати юқори, деталлар анча яхши кўриниб туради.

Galaxy_S6_camera

Аккумулятор

Энг муҳим янгиликлардан бири – бу смартфоннинг зарядланиш тезлиги. Samsung Galaxy S6ни 4 соат ишлатиш учун уни атиги 10 дақиқа зарядлаш етади. Бошқа смартфонлар билан солиштирганда, бу жуда яхши кўрсаткич. Эслатиб ўтамиз, смартфон 2550 мА/с сиғимли аккумлятор билан жихозланган.

Аккумуляторни синаш учун смартфонда Wi-Fi, 3G, 4G, GPRS доим ёқиқ турди ва беш кун давомида доимий ишлатилди. Энг кўп ишлатилган куни смартфонда кечки соат ўнда 15 фоиз заряд қолди ва, фиркимизча, бу жуда ажойиб натижа.

Аккумуляторни тестдан ўтказиш натижалари

Тинимсиз Wi-Fi ишлатилганда: 

Samsung Galaxy S6 – 602 дақиқа;
iPhone 6 – 519 дақиқа;
Sony Xperiza Z3 – 458 дақиқа давомида ишлаши мумкин.

Тинимсиз видео кўрганда: 

Samsung Galaxy S6 – 756 дақиқа;
iPhone 6 – 676 дақиқа;
Sony Xperia Z3 – 579 дақиқа давомида ишлаши мумкин.

Умумун олганда, одатий ишлатишда Samsung Galaxy S6нинг аккумулятори икки кун, фаол ишлатилганда бир кунга бемалол етади. Экран ҳақида гап кетганида тасвир қобилияти 2, 5К Quad HD бўлган экранлар кўпроқ энергия истеъмол қилишини айтиб ўтгандик. Лекин тестимизда смартфон энергияни кам истеъмол қилишини кўрсатди. Бунинг сири янги Samsung процессорининг камроқ энергия талаб қилишидадир.

Хулоса

Samsung Galaxy S6, шубҳасиз, Samsung тарихидаги энг яхши смартфондир. Бу сафар Samsung ҳам дизайн, ҳам техник имкониятлари жиҳатидан бугунги куннинг энг зўр смартфонларидан бирини ишлаб чиқара олди. Samsungни олқишлаймиз, сабаби бу сафар компания Apple маҳсулотлари билан рақобат қила оладиган ҳақиқий сифатли телефон таклиф қилди.

Аммо, Samsung смартфонга SD карта учун слот ўрнатганда, HTC One 9га ўхшаган кучли динамиклар ўрнатганда, сувга чидамлилик хусусиятини қўшганда, янада яхши бўларди.

Кейинги танқид албатта смартфоннинг нархига оид. 600 АҚШ долларидан қимматроққа баҳоланаётган смартфонни кўпчиликнинг ҳамёни кўтара олмаслиги табиий.

Нима бўлганда ҳам, Samsung Galaxy S6 кореялик компаниянинг бошқа смартфонлари, ҳатто Galaxy сериясидаги гаджетлардан ҳам буткул ўзгача бўлибди.

Фируз Аллаев

Хулоса

Қаердан сотиб олиш мумкин?

Asaxiy.Uz 2,794,000 сўм Сотиб олиш

 Афзаллиги

 Камчилиги

Сайт янгиликларидан доимий хабардор бўлиш учун Телеграм каналимизга қўшилинг!