Google Android N операцион тизимининг синов талқинини ишга туширди
Google компанияси томонидан ҳар йилги анъанага кўра ўтказиладиган Google I/O 2016 дастурчилар конференцияси жорий йилнинг 18 – 20 май кунлари Маунтин-Вью (Калифорния)да бўлиб ўтмоқда. Бугун Android N операцион тизимининг синов талқини кенг фойдаланувчилар диққатига ҳавола қилиниши ушбу нуфузли анжуманнинг муҳим воқеаси сифатида эътироф этилмоқда.
Эслатиб ўтамиз, Android N операцион тизими дастурчиларнинг фикр-мулоҳазасини ўрганиш учун аввал март ва сўнг апрель ойида эълон қилинган эди.
Мазкур операцион тизимнинг синов талқинини Nexus 6, Nexus 9, Nexus 5X, Nexus 6P, Nexus Player, Pixel С, Android One смартфонлари фойдаланувчилари қуйидаги манзилдан юклаб олишлари мумкин.
Android N тизимида 250 та ўзгартириш ва янги имкониятлар жорий қилинган. Жумладан, Multi-window – дисплейни бир нечта зарур илова ҳамда вазифаларга бўлиш мумкин бўлган режим, виртуал воқелик технологияси учун VR-режими, Vulkan 3D-рендеринги учун янги API.
Инновацион тизим энди илова ҳамда дастурларни юклаш ва ўрнатишни 75%га тезроқ амалга оширади, ўзининг кейинги талқинларини автомат равишда янгилайди.
Android N тўлиқ талқинда 2016 йилнинг ёзида ишга туширилади. Ҳозирча унга ном беришда Google якуний қарорга келган эмас. Google бу масалада фойдаланувчилардан ёрдам сўрамоқда.
