Google IO 2016: янгилик, натижа ва режалар

Google IO 2016 – анъанавий инновациялар ва сарҳисоб анжумани 18-20 май кунлари бўлиб ўтади.

Google 2008 йилдан бошлаб май ойида Сан-Франциско шаҳрида дастур яратувчиларининг анъанавий конференциясини ташкил этади. “Очиқ инновация” шиори остидаги анжуманда очиқ кодли веб-технологияларда дастурлар яратиш, компаниянинг бу бўйича лойиҳалари муҳокама қилинади.

Анжуман янги ишланмалар намойиши билан ҳам аҳамиятлидир.  Мисол учун, Android мобиль операцион тизимининг сўнгги талқини Android 6.0 Marshmallow 2015 йилнинг май ойида ўтган Google IO 2015 анжумани доирасида эълон қилинган эди. Шунингдек, 2015 йил компания ҳаётида ҳайдовчисиз автомобиль технологиясининг тақдимоти, корпорация таркибида янги Alphabet компаниясига асос солингани билан аҳамиятлидир.

Тилларга тушаётган Microsoft’нинг янги маҳсулотлари, Apple’нинг тобора ошиб бораётган шуҳрати Google’нинг 2016 йилда ҳам самарали фаолият кўрсатишини тақозо қилади. Ушбу ва навбатдаги “Google 2016” рукни остида компаниянинг бу йилги режалари, янгиликларига оид материалларни тақдим қиламиз.