Google Pixel смартфонлари iPhone ва Galaxy “кушандаси”…ми?

Google Pixel смартфонлари iPhone ва Galaxy “кушандаси”…ми?

Аввал хабар берганимиздек, 4 октябрда Google компанияси Сан-Франциско (АҚШ, Калифорния) шаҳрида ўзининг илк смартфонлари – Pixel ва Pixel XL моделларини намойиш қилди. Смартфонларга тегишли техник параметрлар ҳақида сайтимизда ёзиб ўтгандик.

pixel-colors-Google-2016-1-840x473

Қидирув гигантининг янги смартфонлари борасида релизга қадар интернет тармоғида жуда кўп миш-мишлар, рендерлар ва фотосуратлар пайдо бўлди. Албатта, асосан дастурий таъминот ва онлайн сервислар яратишга ихтисослашган компаниянинг смартфон ишлаб чиқариши кўпчиликни бефарқ қолдирмади. Google олдин ҳам бошқа йирик смартфон тайёрлайдиган компаниялар билан ҳамкорликда Nexus сериясидаги қурилмаларни ишлаб чиқарар эди. Бироқ компания ушбу сериянинг кўпроқ дастур қисмига жавоб берар эди, холос. Аммо бу галги смартфонларнинг аппарат ва дастур қисми шахсан қидирув гигантининг назорати остида HTC билан биргаликда ишлаб чиқилди. Nexus сериясидан фарқли ўлароқ, Pixel моделларига Google логотипи туширилган.

Ҳозирда Pixel смартфонлари ҳақида соҳа мутахассислари тарафидан турли, баъзида бир-бирига зид фикрлар билдирилмоқда. Баъзи экспертлар уларни Apple ва Samsung “кушандаси” сифатида эътироф этса, Эльдар Муртазин каби таниқли шарҳловчилар мазкур смартфонлар келажагига шубҳа билан қарашмоқда. Pixel смартфонларининг Nexus сериясидаги  қурилмаларга қараганда икки марта қимматлиги, Android дастурининг сток-версияси қўлланилгани бунинг асосий сабаби сифатида келтирилмоқда.

IMG_7174-1

Нима бўлганда ҳам, назаримизда, ҳали ушбу смартфонларга узил-кесил баҳо беришга бироз эрта. Чунки биринчидан ҳали улар сотувга чиқарилмаган, иккинчидан эса фойдаланувчилар уларни қандай кутиб олишини ҳеч ким билмайди. Сабаби бутун дунёдаги смартфонларнинг асосий қисмига ўрнатилган дастурий таъминот ишлаб чиққан компания, ўз мухлисларига сифатли сервис ва қурилмалар тақдим қила олиши ҳам эҳтимолдан холи эмас, албатта.

google_pixel_pixel_xl_6

Келинг, энди қуйида Pixel смартфонларининг ўзига хос жиҳатлари, техник параметрлари, бошқа аналоглардан фарқли томонлари тўғрисида сўз юритсак.

Жаҳонга машҳур ахборот ресурси The Verge нашрида Google’нинг янги смартфонлари борасида бир нечта таҳлиллар келтирилган. Таҳлилларда смартфонларнинг кучли жиҳатларига эътибор қаратилган. Шубҳасиз, қидирув гигантининг бу галги телефонлари ўзининг илғор техник параметрлари, аппарат қисми ва сервислари билан Nexus қурилмаларидан тубдан фарқ қилади. Агар Google Pixel смартфонига Full HD аниқлигидаги 5 дюймли экран ўрнатилган бўлса, унинг “акаси” Pixel XL моделида 5,5 дюймли Quad HD аниқлигидаги дисплей ўрин олган. Мана шу фактнинг ўзиёқ қидирув гигантининг премиум смартфонлар ишлаб чиқаришга қаттиқ жазм қилганидан далолат беради. Сабаби Quad HD аниқлигидаги экранлар жаҳондаги саноқли смартфонларга ўрнатилган. Бундан ташқари, Pixel қурилмалари энг сўнгги ва илғор Qualcomm Snapdragon 821 процессорида ишлайди, улар Google Daydream виртуал реаллик функциясини қўллаб-қувватлайдиган махсус ва энг охирги Android 7.1 Nougat версияси билан таъминланган.

_91520001_mediaitem91519589

Google’нинг яқинда тайинланган қурилмаларнинг аппарат қисмига масъул раҳбари, Рик Орстерлоу янги Pixel смартфонларининг қуйидаги 5 та ўзига хос хусусиятини санаб ўтган:

Google Assistant. Pixel сериясидаги қурилмалар созланган Google Assistant тизимига эга илк смартфонлар ҳисобланади. Тизимни Home тугмасини босиб туриш ёки “Hot Word” дейиш орқали фаоллаштириш мумкин. Google Assistant турли медиаларни саралаш, фойдаланувчи сўраган мусиқани қўйиш, мусиқа иловасини танлаш функцияларини бажара олади. Шунингдек, унга Google Now хизматидаги турли функциялар ҳам интеграциялашган.

PixelVergleich

Илғор камера. Pixel ва Pixel XL смартфонларидаги камера DxOMark ресурсида 89 балл йиғиб, iPhone 7 сингари (iPhone 7’га эса 86 балл қўйилган) илғор қурилмаларни ортда қолдирди. Pixel ва Pixel XL қурилмаларига 12,3 МПли Sony IMX378 сенсори билан жиҳозлаган пиксель ўлчами 1,55 микрон бўлган f/2,0 диафрагмали асосий камера ўрнатилган. Шунингдек, камерада оптик тасвир стабилизация ҳам кўзда тутилган. Камера хусусиятлари билан батафсилроқ ушбу тавсифда танишиб чиқишингиз мумкин.

Чексиз онлайн (булут) хотира. Google Pixel ва Pixel XL харид қилган фойдаланувчиларга видео ва расмларни онлайн серверда сақлаш учун чексиз хотира тақдим қилишини ҳам маълум этган. Бундай хизматни Apple (5 ГБ) ва Samsung (15 ГБ, Samsung Cloud) каби бошқа смартфон ишлаб чиқарувчилари ҳам ўз мижозларига таклиф қиладилар. Эндиликда Google Pixel ва Pixel XL фойдаланувчилари 1080 пиксель (Full HD) форматигача бўлган видеолар ва турли суратларни (ҳажмидан қатьий назар) онлайн булут серверида исталган миқдорда сақлашлари мумкин бўлади, уларнинг хавфсизлиги учун Google компанияси жавобгарликни зиммасига олган.

Best-Google-Pixel-Cases

Кучли коммуникация имкониятлари. Pixel ва Pixel XL фойдаланувчилари тезкор ва янги Android версияларидан биринчилардан бўлиб баҳраманд бўладилар. Шунингдек, смартфонларга татбиқ этилган тезкор зарядлаш функцияси орқали қурилмани 15 дақиқа қувватлаб, ундан 7 соат давомида фойдаланиш мумкин бўлади. Бундан ташқари, смартфон фойдаланувчиларига 24 соатли техник-профилактика хизмати кўрсатилади.

Виртуал реаллик. Pixel ва Pixel XL смартфонлари виртуал реалликка мўлжалланган Daydream платформасини қўллаб қувватлайди.  Энг қизиғи, VR-шлемнинг нархи 69 долларни ташкил қилади. Бундай нарх билан ҳатто хитойлик арзон қурилмалар ишлаб чиқарадиган фирмаларнинг рақобат қилиши ҳам амри маҳол.

Pixel ва Pixel XL нархлари, албатта, аввалги Nexus моделларига қараганда анча қиммат. Pixel’нинг 32 ГБ талқини $649, 128 ГБ талқини $749, Pixel XL’нинг 32 ГБ талқини  $769, 128 ГБ талқини $869 АҚШ долларидан сотувга чиқарилиши маълум қилинган.

Кўрамиз, қидирув гигантининг смартфон ишлаб чиқариш борасидаги орзу ва режалари қай тарзда амалга ошар экан. Сўнгги хабарларга қараганда, Pixel ва Pixel XL Россия бозорида сотувга чиқарилмайди. Афтидан, Google анча йирик ва бой смартфон бозорларини нишонга олган кўринади.

Мана энди хулоса ўрнида сарлавҳадаги саволга жавоб берсак. Чиндан ҳам Pixel смартфонларини ишлаб чиқариш орқали Google кучли қурилмалар ярата олиши, умуман олганда, смартфон саноатини қўлга олиш истаги борлигини исботлади. Apple моделлари учун Pixel қанчалик хавф туғдиради ҳали номаълум, аммо Samsung ва бошқа Android смартфон ишлаб чиқарувчилари учун бу ўзига хос сигнал ҳисобланади. Ким билади, агар Google смартфонлари яхши оммалашса, қидирув гиганти Android дастури бўйича шунчаки монополия ўрнатиши ҳам эҳтимолдан холи эмас. Лекин буни вақт кўрсатади.