Huawei раҳбари кейинги йил компанияни нима кутаётганини айтди

Huawei раҳбари кейинги йил компанияни нима кутаётганини айтди

Кеча Mobile World Congress (MWC) 2018 анжуманида тақдим қилинган Matebook X Pro намойишидан сўнг Huawei бош директори Ричард Юй журналистлар билан учрашди. Суҳбат чоғида компания раҳбари катта ишонч билан Huawei кейинги 1 йил, узоғи билан 2 йил орасида Apple компаниясидан ўзиб кетишини эълон қилди.

Айни пайтда бозорга тайёрланаётган Huawei P20 смартфони хусусида тўхталар экан, Ричард Юй бу флагман рақобатда $999 доллар турадиган iPhone X смартфонидан ҳар жиҳатдан устун бўлишини маълум қилди. Экспертларнинг фикрича, P20 нарх-наво масаласида ҳам харидорларни хурсанд қилади.

Жаноб Юйнинг сўзларига қараганда, Huawei компанияси яқин вақт ичида фото ва тасвир олишдаги инновацион технологиялари билан смартфон бозорини эгаллаб олади. Компания етакчисининг фикрича, 27 мартда тақдим қилинадиган P20 моделидаги 3 та объектив ёрдамида "яхши" эмас, жуда яхши суратлар олиш мумкин бўлади.

Эслатиб ўтамиз, айни пайтда жаҳоннинг энг яхши суратга олувчи смартфонлари орасида Huawei Mate 10 Pro 97 балл билан иккинчи ўринда турибди. Ундан олдинда бўлган iPhone X ҳам худди шундай балл тўплаган. Google Pixel 2 эса 98 балл билан етакчилик қилмоқда.

Ричард Юй нутқининг якунида ҳам олдинда турган 2 йил Huawei учун омадли келиши, айни пайтда жаҳоннинг учинчи рақамли ишлаб чиқарувчиси бўлган компания Samsung ҳамда Apple компанияларини ортда қолдириб, кучли етакчи бўлишини маълум қилди.

Ҳозирча Huawei олдида турган катта муаммо - жаҳоннинг эгалланмаган смартфон бозорлари ҳисобланади. Компания Европада тез танилиб бормоқда. Бироқ, охирги вақтларда номаълум сабабларга кўра Huawei учун АҚШ смартфон бозорининг эшиклари ёпиб қўйилмоқда.

Экспертларнинг фикрича, Huawei камерафон технологияси билан бирга "ақлли чип" технологиясини ҳам ривожлантиришга алоҳида урғу қаратади. Бироқ, бунинг ўзи етарли эмас. Apple'нинг энг катта устунлиги - смартфонларнинг кучли ҳимоя тизимига эга бўлгани. Ҳозирча Huawei рақибининг мана шу жиҳати билан рақобат қиладиган бирор технология ярата олгани йўқ.

Сайтимизнинг энг чиройли расмларини Инстаграмдаги саҳифамизда томоша қилинг!