Instagram тизимда туриб бошқа аккаунтга ўтиш функциясини синаб кўрмоқда
Айни кунларда шундай функцияга эга Android илова фойдаланувчилар фирк-мулоҳазасини ўрганиш мақсадида, синов тариқасида ишга туширилган.
Оммабоп тармоқнинг ушбу инновацион талқинида фойдаланувчи ўзининг иккинчи профилига ўтишда логин ва калит сўзни қайта киритмайди. Яъни керакли аккаунтга тизимдан чиқмаган ҳолда, айни вақтда фойдаланилаётган профилда кўриниб турган бошқа бир шахсий саҳифанинг белгиси орқали ўтиш мумкин.
Оддий фойдаланувчилар томонидан анчадан буён талаб қилиб келинаётган бу янгилик ўз ўрнида бизнес вакиллари, таниқли брендларнинг жамоатчилик билан ишлаш бўлинмалари мутахассислари каби бир вақтнинг ўзида ҳам касбий, ҳам шахсий саҳифани юритувчилар учун бу айни муддао.
Хоҳловчилар Android қурилмаларига мўлжалланган ушбу дастурнинг синовчиларидан бирига айланишлари ҳам мумкин.
Бу қулайликдан фойдаланишни истаган фойдаланувчилар Instagram саҳифаларидаги “Созламалар” бўлимига кириб, “Аккаунт қўшиш” буйруғи ёрдамида мавжуд ёки шу жараённинг ўзида яратилган янги саҳифаларини ўзаро боғлаб қўйишлари мумкин. Шундан кейин экранда, саҳифанинг юқори чап томон қисмида танлаш функцияси ишга тушади.
Фотосурат ва видеоёзувларни бепул алмашишга хизмат қилувчи Instagram ижтимоий тармоғига 2010 йилнинг октябрь ойида асос солинган. Бугунги кунда тармоқдаги медиа ёзувлар миқдори 20 миллиардга яқин. 2015 йил сентябрь ойи маълумотларига кўра, унинг 400 миллион нафар ойлик фаол фойдаланувчи инстаграммерлари мавжуд.
