iPhone 6 – ёрқин ва катта экранли телефон

Apple компанияси анъанавий меъёрларини бузиб,  ниҳоят катта экранли iPhone чиқаришга қарор қилди.  Смартфонлар бозори аллақачон йирик ҳажмли қурилмалар билан гавжум.  Лекин Apple маҳсулотларининг эълон қилиниши тарихига қарайдиган бўлсак,  компания айрим соҳа ва йўналишларни бошлаб беришда биринчи бўлмаса ҳам,  аксарият ҳолатларда сифат ва оммабопликда бошқалардан ўзиб кетиши маълум.  Шу боис  катта ҳажмли смартфонлар ишлаб чиқаришда Apple рақибларини ортда қолдириб,  бозорда ўз ўрнини топа олишига ҳеч ким шубҳа қилмади.

Дизайн

iPhone 6 каттароқ ва тиниқроқ экранга эга.  Дизайни бўйича ҳам аввaлги авлод iPhone ихлоcмандларининг кўнглини топишга алоҳида диққат қаратилган.  Бу сафар ранглар учта:  кумушранг,  олтин ва кулранг.

iPhone 6  бўйига 5,44 дюйм, энига эса 2,64 дюйм катталикка эга.  Ҳажми бўйича у Моto Х ва янги HTC Оnе ўртасида туради.  Samsung Galaxy S5 билан бир хил катталикда дейиш мумкин.  Лекин iPhone 6 eнгилроқ ва ингичкароқ.

Қиёфасидаги муҳим ўзгаришлардан яна бири унинг ўткир четли ва бурчакли дизайндан воз кечиб,  бошқа кўплаб Андроид қурилмаларида бўлгани каби ясси кўринишни қабул қилганидир.

Экран

5S версиясини ишлатиб юрган одамнинг қўлида iPhone 6 анча катта кўринади.  Шунга қарамай,  у қулай ва ишлатишда катталиги панд бермайди.  iPhone 6 нинг энг муҳим ютуғи ёки ўзига хос жиҳати бу унинг экрани.  У диагоналига 4,7 дюйм бўлиб,  резолюцияси бўйига 1334 пиксел ва энига 750 пикселни ташкил этади.  У Samsung Galaxy Note 4 каби пикселларининг зичлиги билан эмас,  балки ҳаддан зиёд ёрқин ва тиниқлиги билан ажралиб туради.  Ранглар жуда тиниқ ва қиялатиб ҳам экранни бемалол кўриш мумкин.

Apple шунчаки катта экранли смартфон яратишни мақсад қилмаган,  балки катта экранли телефонларни қандай ишлатиш бўйича ҳам янги мезонларни ўрнатишни хоҳлаган.  Бу билан эса y биз телефон орқали қиладиган ва кўрадиган нарсaларга ўзгариш олиб кирмоқчи.

Батарея

Ҳажмнинг катталашишидан фойда кўрган энг муҳим телефон қисмларидан бири унинг батареяси.  iPhone 6нинг батареяси кўп фойдаланилган ҳолатда бир ярим кунгача етади.

Янги телефонда,  шунингдек,  NFC тизими ўрнатилган бўлиб,  энди телефон орқали дўконларда нарсаларни харид қилиш мумкин.  Аppleнинг машҳур Аpple Pay тўлов тизими ҳам NFC технологияси асосида ишлайди.  Wi-Fi ва LTE технологияларида ҳам яхшиланиш кузатилган ва натижада интернетга уланиш тезлиги ва сифати ошган.

Камера

Телефоннинг яна бир алоҳида эътиборни тортувчи жиҳати бу унинг 8 мегапикселли камерасидир.  Мегапикселлари миқдорида ўзгариш рўй бермаган бўлса ҳам,  iPhone 6 янги сенсорлар билан жиҳозланган.  Бу эса расм сифатининг яхшиланишига ҳисса қўшади.

Операцион тизим

Смартфон,  шунингдек,  янги iOS 8 операцион тизими билан қуролланган.  Телефон ички дизайнида ўзгаришлар кўп.  Клавиатуранинг терилаётган сўзларни олдиндан сезиш ҳисси кучайган.

Афсуски,  iOS 8 нинг барча янги хусусиятлари ҳали iPhone 6 учун мавжуд эмас.  Масалан,  қўнғироқлар ва смсларни бир қурилмадан иккинчисига ўтказиш ёки телефонда бўлаётган суҳбатни бошқа қурилмага ўтказиб давом эттириш имкониятлари ваъда қилинган, аммо ҳали жoрий этилмаган.

iPhone 6 смартфони 16,  64 ва 128 гигабайт ички хотирага эга.  АҚШда бу телефоннинг контрактcиз ва қулфланмаган моделлари 650 (16 гб),  750 (64 гб) ва 850 доллардан (128 гб) сотилмоқда.

Расмлар