iPhone 7’да кўзга ташланаётган энг катта муаммо айтилди
Apple томонидан iPhone 7 смартфонлари сериясида тақдим қилинган “жилосиз қора” (Matte Black) ҳамда жилодор қора (Jet Black) айфонларида корпус ранги билан муаммолар юзага келмоқда.
Apple аввал бошданоқ мазкур айфоннинг Jet Black талқини осон тирналишини маълум қилган эди. Matte Black рангидаги модель тўғрисида эса бундай огоҳлантиришлар берилмаган бўлса ҳам, бу версиядаги қора айфонларда сўнгги пайтларда косметик дефектлар кўп учрамоқда.
Apple фойдаланувчиларини қўллаб-қувватлаш хизматига охирги вақтларда Matte Black рангли айфонга хос айнан мана шу камчилик билан шикоят қилаётганлар сони ошиб кетган. Кўп ҳолларда рангнинг кўчиши смартфон панелининг ён томонларида, тугмача ва карнай атрофларида кузатилмоқда. Мазкур камчилик илк маротаба 2016 йилнинг кузида, iPhone 7 сотила бошланганидан 2 ой ўтиб маълум қилинган эди.
Apple ҳозирча смартфон корпусининг ранги кўчиши билан боғлиқ косметик муаммолар билан боғлиқ мажбурий кафолатни бергани йўқ. Шу боис, жабр кўрган фойдаланувчилар гаджетни бошқасига алмаштириб олишдан умид қилмасалар ҳам бўлади.
Apple iPhone 7 смартфонлари 2016 йилнинг сентябрь ойида тақдим қилинган эди. Гаджетлар сув ҳамда чанг таъсирига бардошли. Унинг юқори талқини бўлмиш iPhone 7 Plus’да иккита камера бош камера вазифасини бажаради. Қурилмада 3,5 миллиметрли анъанавий овоз портидан воз кечилган.
Apple компанияси янги Matte Black ва Jet Black версиядаги айфонлар корпусининг металл сиртини анодлашда ва сайқаллашда кўп босқичли жараёндан ўтказилишини маълум қилган эди. Қурилма экран қисми жуда пишиқ. Apple фойдаланувчиларга қора талқинли iPhone 7’нинг корпусини тирналишдан ҳимоя қилиш учун чехолдан фойдаланишни маслаҳат бермоқда.
