iPhone 7’га Windows XP ўрнатилди!
Тиниб-тинчимаган дастурчилар турли девайсларга бегона операцион тизимларни ўрнатиб, ишлатиш борасида рақобатлашишдан чарчашмайди. Масалан, яқиндагина Hacking Jules номли YouTube-канал жамоаси шунақа бир янгиликка қўл урди – Microsoft ишлаб чиққан Windows XP Professional операцион тизимининг тўлақонли версиясини iPhone 7 смартфонига ўрнатишди.
iPhone 7’да бақувват A10 Fusion процессори ва 2 ГБ тезкор хотира ўрнатилган бўлишига қарамасдан, смартфонда Windows XP тизимининг ишлаш тезлиги ва самарадорлиги анча паст. Гап шундаки, операцион тизим iBox эмулятори орқали виртуал машина ичида ишга туширилган. Уни эса Xcode орқали жейлбрейксиз ҳам ўрнатиш мумкин.
Шунингдек, буни ўзи қилиб кўришни истайдиган қизиқувчан iPhone 7 соҳиблари учун унга Windows XP ўрнатишнинг батафсил йўриқномасини ҳам тақдим этишган. Аммо «Terabayt.Uz» сайти эслатиб ўтади: мазкур иш оқибатида келиб чиқиши мумкин бўлган салбий натижалар учун масъулият бутунлай ўз зиммангиздадир.
