iPhone 7 орқа томонида қўшкамерага эга бўлади
2016 йилнинг сентябрь ойида тақдим қилиниши кутилаётган телефон қурилмаси орқа қисмида LinX Imaging компаниясининг иккита оптик линзали камераларига эга бўлади. Бу тўғрида KGI Securities маркетинг ва консалтинг компанияси таҳлилчиси, “эплшунос” мутахассис сифатида ном чиқарган Мин Чи Ко маълум қилган. Apple мобиль қурилмалар учун мини камералар ишлаб чиқарадиган ушбу исроиллик компанияни бир йил аввал 20 миллион АҚШ долларига сотиб олган эди.
Янги технология бугунгача iPhone 6 ва iPhone 6 Plus, уларнинг янада инновациялашган талқини iPhone 6s қурилмасида татбиқ қилинган. Фақат iPhone Plus ва унинг 4.7 дюймли версиясида суратнинг оптик барқарорлигини таъминловчи функция қўлланилган.
LinX анчадан буён қўш ёки кўп линзали камералар учун зарур аппарат ва дастурий таъминот воситалари устида тажрибалар ўтказиб келмоқда. Қўшкамера технологияси сурат фонидаги элементларнинг тиниқ кўриниши ва манзара қаърини ёрқин рангларда кашф қилинишини таъминлайди. Бу технология келажакда мобиль қурилмаларининг салоҳиятини рақамли бир объективли линзалар ишлатиладиган фотокамераларники билан тенглаштириши мумкин.
Шунингдек, қўшкамера ёруғлик етишмовчилигининг олдини олади, суратни кенг динамик диапазонда олиш, ранглар уйғунлигини сақлаб қолиш, суратга олгандан кейин ҳам суратнинг фокусини танлаш каби қулайликлар яратади. Қолаверса, унинг ёрдамида бир вақтнинг ўзида суратни икки хил оптик ўлчамда сурат олиш мумкин.
Apple мунтазам iPhone қурилмаларини ихчам кўринишда тақдим қилишга одатланган. Бу камерага эга қурилма қанчалик ихчам бўлиши ҳозирча номаълум. Аммо компания телефон аппаратининг ихчамлигига эришишда фотодиодлар микросхемасининг букри шаклини ҳам қўллаб кўрмоқчи.
2016 йил арафасида Apple компания қурилмаларининг фототехнологиясини такомиллаштиришга оид лойиҳаларда 800 нафар мутахассиснинг фаолият кўрсатаётганини айтган эди.
