iPhone 7: Етакчи нашрларнинг тавсиф ва хулосалари  

Apple компанияси бир муддат нашрларга iPhone 7 ҳамда iPhone 7 Plus смартфонлари ҳақида тавсиф ёзишни маън қилган эди. Аммо куни кеча бу таъқиқнинг олиб ташланиши билан жаҳоннинг нуфузли журнал ҳамда ихтисослашган сайтлари қўлларига етиб келган ва ҳали расман сотувга чиқмаган янги айфонларни синовдан ўтказиб, айфонлар ҳақида ёзишмоқда. Биз улардан баъзиларини эътиборингизга ҳавола қиламиз.

TechCrunch

Нуфузли ахборот технологиялар нашри Apple мухлилари ҳафсаласини пир қилган хабар – iPhone дизайнининг янгиланмаслиги билан боғлиқ гап-сўзларнинг тарқалиши компаниянинг айби эканини ёзади. Боиси компания ҳар 2 йилда янгича кўринишдаги айфонни тақдим этишини қайта-қайта айтади. Аслида эса бу галги айфонда Apple янги смартфон дизайни деганда фақат кўриниш эмас, балки унинг қандай ишлаши ҳам муҳим эканини исботлади. Ва, тақдимотдан олдин ҳам асосий урғу шунга қаратилиш керак эди.

Нашрнинг қайд этишича, Apple янги илғор камера, янада ёруғроқ фоточақноқ ва сув таъсиридан ҳимояланган корпус билан мухлисларни ҳайратлантира олди.

TechCrunch янги айфоннинг ҳар иккала талқинидаги камераларда рангни қайд этиш, оптик барқарорлаштириш тизими сифатли ишлайди.

Фақат «қора оникс» талқинидаги корпус жуда осон тирналади ва бу – металл!

3,5 мм аудио портнинг йўқлигини журналист-экспертлар Apple фойдаланувчиларга янада кенг қулайлик яратишга интилаётгани билан изоҳладилар.

Аммо, бу тўлиқ симсизлик ўтилди дегани эмас, переходник ёрдамида ҳали ҳам айфонларда симли гарнитуралардан фойдаланиш мумкин.

Engadget

Яна бир нуфузли нашр бўлмиш Engadget’нинг ёзишича, Apple таваккал қилишга шошмаяпти.  Нашр экспертлари ва таҳлилчилари iPhone 7’га 100 баллик шкалада 91 балл беришди. Смартфоннинг ўзига хосликлари қаторига корпуснинг сувдан ҳимояланганлиги, ёрқин экран киритилган бўлса, шунчаки ўрнатилган “Home” тугмаси ва ўзгармаган дизайн камчиликлар қаторидан жой олди.

iPhone 7 Plus, жумладан, 1 балл юқори баҳо олди. Қўш кўзли айфонда, шунингдек, камера созламасининг қулай интерфейси ҳам қайд этилган. Бироқ, компания қўйган нарх-навонинг жуда баландлиги ҳам алоҳида айтилмоқда. Қолган яхши ва ёмон жиҳатлари iPhone 7’ники каби.

 The Verge

Ахборот технологиялари оламининг яна бир таниқли нашри бўлмиш The Verge бош муҳаррири Нилай Пателнинг айтишича, iPhone 7 ҳамда 7 Plus – ниҳоятда ўзгача қурилмалар.

Улар бугунги смарфтон фойдаланувчилари ўрганиб қолган қоидаларни рад этишса-да, кўринишини ҳисобга олмаганда, аввалги айфонлардан фарқ қилмайди.

Муҳаррир iPhone 7 ҳамда 7 Plus “смартфон келажаги тўғрисида кучли баёнот” эканини,  iPhone 7 Plus смартфонидаги қўш камералар мобиль фотографиянинг янги даврини бошлаб беришини қайд этган.

Шу ўринда фикрлар орасида “Home” тугмаси ҳам энди моддий клавиш сифатида рамзийлашиб, кўпроқ датчиклар масканига айланиб бораётгани қайд этилган.

A10 Fusion процессори эса фаолиятига кўра ноутбукларнинг чиплари билан беллаша оладиган 2 та кучли ядро, шунингдек смартфон аккумуляторига қўшимча 2 соат ишлаш имконини берадиган яна 2 та қувват тежайдиган ядрога эгалиги нашр тавсифида қайд этилган.

Шунингдек, тавсифда iPhone 7 камерасининг ёруғлик паст жойда олган суратлари бошқа телефон камераларида олинган суратлар билан таққосланган.

Apple’нинг  iPhone корпусидан 3,5 мм портнинг олиб ташланиши эса, компаниянинг ўзига шуни  эп кўргани, бу Apple’нинг танлови экани билан изоҳланган. Бир вақтлар флоппи-дисклар, оптик дисклар, хотира карталари, USB-портлардан воз кечишни ҳам айнан Apple бошлаб берган ва кейинчалик бошқа ишлаб чиқарувчилар ҳам бу тамойилларни қабул қилишган.

Нашр янги айфонларга 10 дан 9 балл қўйган. The Verge муҳаррири, шунингдек iPhone 7’ни келажак смарфтонларининг ўтиш босқичи деб ифодалаган.

The Wall Street Journal

Бу таниқли журнал ҳам Apple’нинг янги смартфонларини илиқ қарши олган. Аммо, журнал муҳаррирлари смартфонлардан 3,5 мм портнинг олиб ташланиши беҳуда ва ўринсиз уриниш бўлганини жар солиб ёзишган эди.  Apple бу орқали корпус ичини кенгайтиришга эришган.

Тавсифда корпуснинг сув таъсирига бардошли экани, қоронғуда ҳам энди қўрқмасдан сурат олиш мумкинлиги қайд этилган.

Шунингдек, тавсиф муаллифи Жофри Фаулер смартфонни сувга “чўктирган”, унинг қувват манбаини синовдан ўтказган. Сув тушиб чиққан смартфон “яшаб кетган” ва қувват бўйича синовда аккумулятор аввалги айфонлардан 1,5 соат кўпроқ ишлашини исботлаган. Умуман олганда, iPhone 7 ҳамда 7 Plus кучлироқ аккумуляторга, сифатли сурат оладиган камера эга бўлгани ҳисобга олиниб, уларнинг муносиб смартфон экани ифода этилган.

Айтганча, iPhone 6s ҳамда 7 ва Samsung Galaxy S7 edge ҳамда iPhone 7 Plus’да олинган суратларга сиз ҳам баҳо беринг.

Pocket Lint

Нашрнинг ёзишича, iPhone 7 ва 7 Plus катта ўзгаришларни бошлаб келган. Силлиқ «қора оникс» корпуси журналистга iPhone 3G’ни эслатиб юборибди ва бармоқ изларига ўч экан.  Металлнинг шиша билан уйғунлашуви моҳирлик билан амалга оширилган.

Тавсифда энди iPhone 7’нинг сувга тушиб кетиши фойдаланувчи учун қиёматни эслатмаслиги алоҳида эътироф этилади. Шунингдек, қўш динамикага эга iPhone аппаратининг акустикаси ҳам ижобий баҳоланган.

Тавсифда “Home” тугмаси Force Touch бармоқ зарбини сезиш технологиясида ишлаши ва у вибрация орқали қўшимча маълумотларни тақдим этиши смартфон саноатида янгилик экани айтилган.

The New York Times

Газетанинг билдирган муносабати қуйидагича: «iPhone 7 ва 7 Plus идеаль эмас, бироқ улар орқали Apple мухлисларига берган ваъдасини оқлади». Камчиликлар эса айфоннинг такомиллашуви учун муҳим қадам бўлади. 3,5 мм портнинг олиб ташланиши эса энди ўтмиш ва «Home» тугмасидаги янгиланиш унинг кейинги айфон авлодида виртуаль шаклга  ўтишини англатади.

Time

Time янги смартфонларни «Apple шу вақтга яратган энг яхши iPhone» дея баҳолаган. Унинг яхши жиҳатлари қаторига самарадорлиги, энг содда талқинда ҳам 32 ГБ доимий хотира татбиқ этилгани айтилса, 3,5 мм портнинг олиб ташланиши, Android-флагманлардан узоғроқ қувват олиши камчиликлари қаторидан ўрин эгаллаган.

Time’нинг айтишича, суратга тушишни хуш кўрганлар, доимо чўнтагида янги “Олма” маҳсулоти бўлишини истайдиган Apple ишқибозлари учун iPhone 7 айни муддао экан.

Time iPhone 7 камерасини Зион миллий боғида синовдан ўтказган.  Унга ўзингиз баҳо беринг.

Қуйидагилар эса iPhone 7 Plus смартфонида олинган суратлар. 

Mashable

Нашр  iPhone 7 ҳамда 7 Plus смартфонлари думалоқ аудио порт бўлса-бўлмаса, барибир ажойиб смартфонлар бўлиб қолишларини ёзган.  iPhone 7’нинг бежиримлиги, янгича “Home” тугмаси, камераси, фаолият самарадорлиги, қувват тизими нашрга маъқул бўлган экан. Камчилик сифатида Mashable ҳам 3,5 мм портнинг олиб ташланиши, «қора оникс» талқинининг осон тирналишини ёзган.

iPhone 7 ҳамда 7 Plus олган суратлар бу ерда ҳам Samsung Galaxy S7 олган суратлар билан таққосланади.

Умумий олганда iPhone 7 – бу  iPhone 6s’нинг саййқалланган талқини экани айтилади.

“iPhone 7 Plus’ни харид қилмасангиз, бошқа яхши смартфон топа олмай бошингиз қотади”, дейди журналист Лэнс Уланофф.

Янги айфонларнинг тўлиқ имкониятлари ҳали очилганича йўқ. Apple анъанага кўра, тақдимотда iPhone 7 ва 7 Plus’га оид кўп техник жиҳатларни, жумладан аккумулятор сиғимини маълум қилмаган эди.
13 сентябрь куни эса 4,7 дюймли iPhone 7’нинг аккумулятор сиғими 1960 мА соат (iPhone 6s’ники 1750 мА соат эди), iPhone 7 Plus’нинг аккумулятор сиғими эса 2900 мА соат ( iPhone 6s Plus’ники 2750 мА соат) экан.

Жараённи кузатишда давом этамиз!