«iPhone 8» аллақачон Хитойда 100 доллардан сотувга чиқди! (+видео)

Apple’нинг «юбилей» смартфони ҳали тақдим этилмай туриб, Хитойда аллақачон ромсиз «iPhone 8» савдога қўйилган. Бу – унинг айнан унинг ўзидай қилиб ишланган, ҳатто қутилариям оригиналига ўхшаган сифатли қалбаки маҳсулотдир, деб ёзади AKKet.com.

Бутун дунё аҳли сабрсизлик билан кутаётган мазкур флагманга АҚШлик видеоблогер буюртма берган. Маҳсулот Хитойдан етиб келгач, унинг видеотавсифини тайёрлаб, ўзининг YouTube-каналига жойлаган.

Бир қарашда, буни ҳақиқий iPhone 8 деб ўйлаш ҳам мумкин. У барча оммабоп рангларда сотувга чиқарилган, жумладан, янги (RED) Special Edition тусида ҳам. Видеоблогер айнан мана шу рангдагисини очиб ва текшириб, ишлатиб кўришга қарор қилган. Шунингдек, смартфоннинг ичини очиб, айрим деталларига ҳам маъриф берган.

Тушунган одам дарров фаҳмлайдики, бу «олмали» компаниянинг янги маҳсулоти эмас, балки унинг сифатли ишланган клонидир. Видеолавҳа муаллифининг таъкидлашича, у мазкур смартфонни Хитойдан атиги 100 АҚШ доллари эвазига буюртма бериб олдирган. Apple’нинг ҳақиқий флагмани нархи бундан нақ ўн баравар юқори эканлигини ҳамма билса-да, сотувчи бу маҳсулотни оригинал, деб ишонтиришга роса ҳаракат қилган.

Аниқланишича, «хитойча iPhone 8» худди iOS 10’га ўхшатиб яхшигина ниқобланган Android операцион тизими бошқарувида ишлайди. Гарчи экрани смартфоннинг олд панелини тўлиқ эгаллаган бўлса-да, қурилмани ишга туширганда кўринадики, аслида дисплей унинг анчагина кичкина қисмида жойлашган. Табиийки, экраннинг ўзи ҳам паст сифатли, 3D Touch технологияси эса унда дастурий эмулятор ёрдамида ишлайди.

Марҳамат, ўзингиз томоша қилинг:

Видеоролик муаллифининг айтишича, бундай «iPhone 8»лар Хитойда сотувга чиққанига аллақачон бир неча ҳафта бўлган. Яқин келажакда бу смартфонлар бошқа мамлакатларнинг бозорларига ҳам кириб бориши мумкин. Табиийки, харидорларни ишонтириш мақсадида уни асл маҳсулот нархига яқин – қимматроқ сотишади. Уларга алданиб қолмаслик учун, эътиборли бўлишни ва фақат синалган, ишончли савдо нуқталаридан харид қилишни тавсия этамиз.

Эслатиб ўтамиз, хитойликлар бундан олдин ҳам қалбаки iPhone 8 ишлаб чиқаришган эди, аммо бу янгиси тўлиқ жамланмаси билан сотилаётгани эътиборга лойиқ.