iPhone эгалари ҳайратда – болалар ўйинларида порносайтлар рекламаси!

Кейинги пайтларда кўплаб iPhone соҳиблари болаларга мўлжалланган иловаларда беҳаё сайтларга кириш йўлини кўрсатувчи очиқ рекламалар пайдо бўлганидан нолишмоқда. Бу каби шикоятлар кўп сайтларда, ҳатто Apple’нинг расмий форумида ҳам ёзилаётган бўлса-да, купертинолик гигант ҳалиям бунга бирор изоҳ бермаяпти.

ЎҚИНГ: Қўл телефонида Ўзбекистонга порнографик материаллар олиб киришга уринган аёллар ушланди

«Катталарбоп» реклама контентига дуч келган бир фойдаланувчи воқеани бундай баён этади:

«Кичкина укам менинг iPhone’имда ўйин ўйнаб ўтирган эди. Бирданига у бақириб, смартфонга кимдир бузиб кирганини айтиб қолди. Мен тезда чопиб бориб, айфонни қўлидан олдим ва кўрдимки, экранда машҳур бир порносайт рекламаси кетаётган экан».

Баннерни қайта томоша қилишдан англашиладики, унда ўша беҳаё сайтнинг ўзи эмас, балки интернетга VPN орқали кириш имконини берувчи илова реклама қилинган. Дастур ишлаб чиқувчилари баннер тарзида қисқа йўриқнома жойлашган – унда провайдернинг ёки мобил қурилманинг ҳар қандай чекловини ҳам четлаб ўтиб, порносайтга кириш йўли кўрсатиб берилган экан.

ЎҚИНГ: VPN нима ўзи?

Бу каби реклама видеоларининг болаларбоп иловаларга ўрнатилганидан бошқалар ҳам шикоят қилишган. Фойдаланувчиларнинг фикрича, бунақа контентни болаларга кўрсатиш мумкин эмас, шунинг учун ҳам Apple тезда бунинг чорасини кўриши лозим.

Хабарларга кўра, бу ҳолат жуда кам учрамоқда, аммо барибир ёш боланинг руҳиятига салбий таъсир кўрсатиши аниқ.

Айтишларича, жорий йилнинг июнь ойида бўлиб ўтадиган WWDC 2018 кўргазмасида iOS 12 тизим талқини тақдим этилади. Шу талқинда ота-оналар назорати бўйича кенгайтирилган имкониятлар ҳам бўлади.

Унгача эса, ҳар эҳтимолга қарши, сиз ҳам мана бу тавсияларимиз билан танишиб чиқинг: iPhone ва iPad’да боланинг нобоп сайтларга киришини чеклаймиз